د نظامي امر بالمعروف د منکراتو د ازالې مشر مولوي راز محمد د سه شبنې پر ورځ د « ۱۴۰۰ کال د لېندۍ پر ۱۶ مه» د کابل ښار شپږمې حوزې له ځواکونو نه لیدنه وکړه.
راز محمد وايي، داسلامي امارت هېڅ نظامي کس حق نه لري،چې د نورو چارو کې لاسوهنه وکړي او په نظام کې ګډوډي رامنځته کړي.
هغه سپارښتنه وکړه،هر نظامي کس باید خپل مسوولیت وپېژني،هغه په سمه توګه یې ترسره کړي او له هېڅ قانون باید سرغړونه ونه کړي، که نه زندان به یې ځای شي.
رازمحمد وايي:« څومره راته محترم یې،چې څومره دې لحاظ کړم، خو د الله د حکم په مقابل کې د نظام د موادو او فرماینو په مقابل کې بیا یوه زره لحاظ هم نه کوم او که د یوه حکم په نقض سره ته د بند مسحق شوې،بیا به زندان ته ځې.»
راز محمد وايي،که په استثنایي حالت کې که کومه اداره له نظامي کس همکاري وغواړي،بیا دې ورسره بشپړه همکاري وکړي.
هغه د اسلامي امارت ځواکونو ته سپارښتنه وکړه،چې د خپلو مسولیتونو سرته رسولو لپاره وخت په نظر کې مه نیسئ.
رازمحمد زیاته کړه:« نظامیان ملګري باید په دې باندې پوه شي،چې د امر بالمعروف یا د نورو ارګانونو په کار کې لاسوهنه ونه کړي، د دغه کار لپاره باقاعده مسوولین ګومارل شوي دي. د ښار د امر بالمعروف لپاره د ولایاتو د امر بالمعروف لپاره مستقل تشکیلات جوړ شوي دي او هغوی به ان شاءالله د حکمت له لارې هغه خپل کار پر مخ بیایي.»
په ورته مهال د اسلامي امارت نظامي منسوبینو ژمنه وکړه،چې خپل مسوولیت به په سمه توګه سرته رسوي او د نورو ادارو په چارو کې به لاسونه نه کوي او د خپلو مشرانو اطاعت به کوي.
د شپږمې امنیتي حوزې یو سرتېری وايي:« ان شاءالله کومې خبرې چې دوی کوي،موږ به د دوی له امر سره د یوې زرې په اندازه هم مخالفت نه کوو،ځکه چې اسلامي امارت مخته روان دی نو پواسطه د اطاعت روان دی او اطاعت چې نه وي،نو اسلامي امارت هېڅکله مخته تللی نه شي.»
نظامي امربالمعروف وایي،د ټولو نظامیانو لپاره یې تګلاره د کوچني کتاب په څېر چاپ کړې،چې باید د هر سرتیري په جیب کې وي او په ټولو قوانینو یې ځان پوه کړي.
