د پلازمېنې کابل ښار په پامیر سینما کې د مطالعې کوونکو لپاره درې ورځنی نندارتون پرانیستل شو.
په دې نندارتون کې بېلابېل کتابونه نندارې اېښودل شوي دي.
ورغلي کسان د نندارتون پرانيستې له امله خوښ دي او په راتلونکي کې د ورته نورو نندارتونو د جوړېدو غوښتنه کوي.
له دې سره په یوه وخت، د کابل ښار کتاب پلورونکو لپاره د کتاب پلورنې ځانګړی مارکېټ هم پرانیستل شو چې نږدې ۲۰۰ غرفې لري.
کتاب پلورونکي خوښ دي چې د ښار په یوې مهمې سوداګریزې سیمه کې ورته د کتاب پلورلو لپاره ځای برابر شوی، خو زیاتوي چې جوړې شوې غرفې کوچنۍ دي او باید د کتاب ناشرانو لپاره سترې هټۍ برابرې شي.
کتاب پلورونکی عبدالحی وايي: « موږ په یوه لوی امېد دلته راغلي یو، د دې ځای موقعیت هم تر پخواني ځای ښه دی، دا ځای پاک دی، پارک او اوبه هم شته.»
کتاب پلورونکی محمد رفېع وايي: « دلته داسې ناشران دي چې د کتابونو په لحاظ شاید یوه غرفه د یوه کتاب په چاپ سره ډکه شي. باید ناشرانو ته له دې لوی ځای ورکړل شي. دا د پرچون پلورنې ځای دی او موږ اړ یو چې له هر چاپ شوي کتاب یوازې څو ټوکه راوړو.»
دغه کتاب پلورونکي چې د جوی شیر له سیمې څ د سړک جوړېدو له امله دغه نوي مارکېټ ته رالېږدول شوي، زیاتوي چې اوس یې د کتاب خرڅلاو خوند نه شته او باید د هټیو په کرایه کې ورسره مراعت وشي.
کتاب پلورونکی حاجي محمد رفیق وايي: « اوس د پخوا په څېر فروشات نه شته، دولت باید د دې دوکانونو کرایه کمه کړي.»
په ورته مهال، د اطلاعاتو او کلتور وزارت چارواکي وايي، د ټولنیزو رسنیو له امله د مطالعې دود کمرنګه شوی، خو هڅه کوي چې د نندارتونونو پر مټ د کتاب مطالعې فرهنګ بېرته پياوړی کړي او همدا راز د کتاب پلورونکو لپاره اسانتیاوې برابرې کړي.
د اطلاعاتو او کلتور وزارت د نشراتو معین حیات الله مهاجر فراهي وايي: « د کتاب او کتاب د مطالعې لپاره باید خپل ځوانان او خلک رامات کړو. له بده مرغه زموږ په هېواد کې د لوست او مطالعې فرهنګ نه شته او په ځانګړې توګه د خواله رسنیو په رامنځته کېدو سره دا فرهنګ نور هم له منځه تللی. د اطلاعاتو او فرهنګ وزارت هڅه کوي چې په دې برخه کې د کتاب لپاره بېلابېل نندارتونونه جوړ کړي او دغه راز د کتاب پلورونکو او ناشرانو لپاره اسانتیاوې رامنځته کړي.»
د یادولو ده چې په دې وروستیو کې د افغانستان په ګڼ شمېر ولایتونو کې د کتاب لوستنې فرهنګ په اړه هڅې پیل شوې دي.
د کتاب دوستانو په خبره، کتاب هغه ښوونکی دی چې د نړۍ په هره څنډه کې له تاسره مل وي.
د یوه بل باور له مخې، کتاب د انسان ښه ملګر دی چې په مطالعې سره یې انسانان ډېر څه زده کولی شي.
