اسلامي امارت د ملګرو ملتونو امنيت شورا له لوري په تازه خپور شوي راپور کې هغه ادعاوې رد کړې چې ګڼې په افغانستان کې وسله والې ډلې حضور، پټنځايونه او ازادانه فعاليت لري.
دې راپور کې د امنيت شورا له لوري نړيوال امنيتي وضعيت ارزونې ته کتنه شوې او په کې ادعا شوې، چې په سوېلي اسيا کې د افغانستان خاوره د يو شمېر وسله والو ډلو د فعاليت او پټنځايونو په توګه کارېږي.
په راپور کې د داعش پر وړاندې د سرپرست حکومت اقداماتو ته هم اشاره شوې او ويل شوي چې ياده ډله يې تر ډېره کمزورې کړې خو د نورو هغو پر وړاندې يې لازم اقدامات نه دي کړي.
د راپور یوه برخه:« سرپرست حکومت لاهم د يو شمېر ترهګرو ډلو د فعاليت لپاره اسانه چاپېريال برابر کړی چې په کې القاعده او نورې اړوندې ډلې شاملې دي. دا د مرکزي اسيا او نورو هېوادونو لپاره جدي خطر دی.»
خو د اسلامي امارت ویاند دا ادعاوې نه مني او پر نړيواله کچه يې د افغانستان په اړه د اندېښنو اېجادولو لپاره ځيني استخباراتي سازمانونو هڅه بولي.
ذبیح الله مجاهد وايي، اوس مهال په افغانستان کې مرکزي قيادت شته چې په خبره يې په ټوله جغرافيه بشپړ حاکميت لري.
هغه په دې اړه وايي:« موږ دغه ادعا پر کلکه ردوو، دغه شان بنسټونه تل د افغانستان په اړه باندې پروپاګند امیزه راپورونه خپروي. هدف یې دا وي چې پر نړیواله سطحه باندې تشوېش رامنځته کړې او په دې کې د استخباراتي کړیو لاس دی او هغه هېوادونه چې د افغانستان ښيګڼه نه غواړي، دلته د ارام په اړه خلکو ته تشوېش اچول غواړي. هغوی دغه شان موارد په هغو باندې وايي او دغه شان نهاد دی چې ګواکی یو بې طرفه نهاد دی، ادعاوې کېږي. افغانستان کې واحد نظام دی، وروسته له ۴۰ کلونو افغانان توانېدلي چې یو نظام ولري او بشپړ کنټرول پر خپله خاوره ولري. هېڅ بهرنیو خلکو ته چې هغه مسلح وي، خپلسري وي، دلته ورته د فعالیت اجازه نه شته دی او نه شتون لري. په کوردننه هم هيڅ ډول مسلح جهتونو ته د فعالیت اجازه نه ورکول کېږي او ټول خلع سلاح شوې دي.»
د ملګرو ملتونو امنيت شورا په راپور کې دا هم ويل شوي چې بلوڅ ازادي غوښتونکي او د پاکستاني طالبانو تحریک له يو له بل سره د ګډې همغږۍ له مخې همکاري لري او په پایله کې يې د دواړو ډلو تحرکات پياوړي شوي.
دغه راپور د ملګرو ملتونو امنيت شورا کې د ۱۹۸۸ کميټې له لوري چې پر سرپرست حکومت د لګېدلو بندیزونو د څار دنده مخته وړي، د يو کلن امنيتي راپور په توګه وړاندې شوی.
د سیاسي چارو شنونکي په ياده کمېټه کې د پاکستان استازي موقتي مشرۍ ته په اشارې وايي، د دې سازمان لخوا د افغانستان امنيتي وضعيت په اړه د اندېښنو راپورونه په لويديځ کې د ځينو هېوادونو او پاکستان د مشترکو منابعو پر بنسټ چمتوو کېږي.
د سیاسي چارو شنونکی شهسوار سنګروال وايي:« پاکستان په بېلابېلو ستېجونو کې، په بېلابېلو ناستو کې تل دا خبره کړې چې په افغانستان کې تروریستان دي. دوی د ټيټيپي په څنګ کې نورې تروریستي ډلې هم شامله وي. که څه هم ټيټيپي تروریستي ډله نه ده، خو بیا هم نورې کومې ډلې لکه داعش، دا ځکه ورسره ګډوي چې نړۍ ته وښي په افغانستان کې تروریستي ډلې موجودې دي. که چېرته په افغانستان کې تروریستي ډلې موجودې وی او دا د منځنۍ اسیا هېوادونو ته ګواښ وی. نو د منځنۍ اسیا هېوادونو به دغه ډول غبرګون ښودلی وی.»
د سیاسي چارو شنونکی توریالی ځاځی وايي:« ملګري ملتونه خپلواک نه دي. که دوی خپلواک وی، نن به په نړۍ کې دغه ډول لوبې نه ترسره کېدې. د نړۍ واک د زبرځواکونو هېوادونو په لاس کې دی. دوی د خپلو سیاسي اهدافو او ګټو لپاره له دغه جنایتکارنه سیاست کار اخلي.»
ټاکل شوې ده چې په سپټمبر میاشت کې د ملګرو ملتونو عمومي اسمبلې ۸۰ یمه ناسته پيل شي او په دغه ناسته کې به د هېوادونو استازو له لوري له افغانستان سره پر سياسي تعاملاتو، کېدونکو بشري مرستو او نورو اړوند مسايلو هم خبرې وشي.
