د سیاسي چارو کارپوه عزیز معارج وايي:« دا چې نړیوال وايي، باید له طالبانو سره سیاسي تعامل وشي،خو په عمل کې نه راوړاندې کېږي. په دې کې دوه هدفه دي،یو غواړي دوی چې پر طالبانو باید تحمیل کړي خپل لاسپوڅي او د پخواني ریژم ځینې کسان هغه کادرونه چې دوی روزلي دي او دویم غواړي،خلک مصروف وساتي او له فرصته ګټه واخلي او خپلې نورې پروژې پلې کړي.»
ځېنې بیا په دې باور دي،چې نړۍ لاهم په افغانستان کې د اسلامي نظام له جوړښت سره اړخ نه لګوي او له همدې امله نه غواړي،چې د کابل له نوي حکومت سره په عملي توګه سیاسي اړیکې ټينګې کړي.
د سیاسي چارو کارپوه عبدالحق حماد وايي:« د ټولو نړیوالو زړه غواړي ،چې له نوي نظام سره تعامل وکړي،داچې عملآ نه راوړاندې کېږي،زه فکر کوم دوی نه غواړي، په هغه توګه نظام چې اسلامي امارت یې غواړي. »
د سیاسي چارو کارپوهان وايي، ترهغې چې د اسلامي امارت د کابینې غړي په تورلیست کې شامل وي، واشنګټن به له کابل سره رسمي سیاسي اړیکو ته زړه ښه نه کړي او په دې تړاو لویدیځ هم د امریکا دریځ ته ګوري.
د سیاسي چارو کارپوه طارق فرهادي وايي:« له امریکا تر هغې سیاسي تعامل امکان نه لري، ترڅو چې د طالبانو دکابینې غړي په تورلیست کې وي. غربي هېوادونه هم د افغانستان په تړاو د امریکا د ستراتیژۍ تابع دي.»
د اسلامي امارت د ویاند مرستیال بلال کریمي بیا وايي،غواړي، له نړۍ سره ښې او مانا لرونکې دیپلوماتیکې اړیکي ولري،خو لومړی باید د دوحې هوکړه عملي شي او د اسلامي امارت د غړو نومونه له تورلیسته واېستل شي .
کریمي زیاته کړه:« اسلامي امارت هم غواړي،له نړۍ سره ښه روابط ولري او مانا داره اوقوي دیپلوماتیک راوبط ټینګ شي،خو مهمه دا ده،چې روابط او تعاملات پر متقابل احترام ولاړ وي او اسلامي امارت له نړۍ سره کار کولو ته لېواله دی. هغه د افغانانو کنګل شوې پیسې دې راخوشې شي او د دوحې تړون دې پر بشپړه توګه عملي شي او تورلیستونه دې پاک شي.»
له افغانستان سره د نړۍ او سیمې بشري مرستې او په کابل کې د ځينو هېوادونوسفارتونو فعالیت هغه څه دي،چې څارونکي یې خاموشه رسمي اړیکې ګڼي.
