د روسیې او ترکیې چارواکو د افغانستان روان سیاسي ثبات په اړه خبرې او بحثونه کړي.
د روسيې ټاس خبري اژانس د دې هېواد د بهرنیو چاور وزارت له قوله لیکلي، دواړو لوریو د افغانستان سیاسي ثبات پر اقداماتو خبرې کړې.
د روسیې بهرنیو چارو وزارت مرستیال اندري رودینکو او په مسکو کې د ترکیې سفیر تانجو بیلګیچ د افغانستان ترڅنګ د سیمې پر روان سیاسي او امنیتي وضعیت هم تم شوي دي.
د روسیې بهرنیو چارو وزارت ویلي: « دواړو لوریو په دې خبرو کې د اسیا پاسیفیک سیمه ییزو چارو او په ځانګړي ډول د افغانستان پر روان سیاسي ثبات او هڅو باندې خبرې وکړې. دا خبرې تر ډېره د افغانستان او روسیې ترمنځ د وروستیو اړیکو پرمختګ ته په پام شوې دي. دواړو لوریو همدارنګه د افغانستان ترڅنګ په سیمه ییز وضعیت هم خبرې او بحثونه وکړل.»
د روسیې د بهرنیو چارو وزارت د مالوماتو له مخې، دا خبرې او بحثونه د ترکیې په خوښه شوې دي.
د سیاسي چارو شنونکي بیا وایي، روسیه او ترکیه هڅه کوي چې په افغانستان کې له سرپرست حکومت سره په بېلابېلو برخو کې سیاسي تعامل او همکاري ولري.
د سیاسي چارو شنونکی معین ګل څمکنی وايي: « داسې مالومېږي چې ترکیه د اسراییلو او امریکا له خوا اوس په پخوانۍ تله باندې نه تلل کېږي. امکان شته چې ترکیه له ناټو تړونه ووځي او له شرقي بلاک سره یوځای شي.»
ځینې نور بیا په دې باور دي چې له روسیې وروسته ترکیه هم غواړي چې له اسلامي امارت سره رسمي سیاسي تعامل ته را وړاندې شي.
د دوی په باور، ترکیه له تېرو څلورو کلونو راهیسې هڅه کوي چې په څه نا څه ډول سیاسي تعامل ته لاره جوړه کړي.
د پوهنتون استاد فیض محمد ځلاند وايي: « د سیمې هېوادونه تل کوښښ کوي چې له افغانستان سره ځانګړې او د خپلو ستونزو هوارولو پر بنسټ اړیکې ورغوي. دا چې په دې وروستیو کې د سیمې یو شمېر هېوادونه او په ځانګړې توګه روسیه او ترکیه د افغانستان د مسایلو په تړاو خبرې کوي، ماته ښکاري چې دوی به د سیمه ییزې همکارۍ په اړه ځینې هوکړې هم وکړي او دغه راز له افغانستان سره سیاسي، اقتصادي او ټولنیزه راکړه ورکړه ولري.»
که څه هم د سرپرست حکومت چارواکي د روسیې او ترکیې چارواکو د تازه څرګندونو په تړاو څه نه وایي، خو د یادولو ده چې د روانې جولای میاشتې پر ۳ مه روسیه لومړنی هېواد شو چې د افغانستان اسلامي امارت حکومت يې پر رسمیت وپېژاند او دا څه د دې سبب شول چې دواړه هېوادونو په ډیپلوماټیک ډګر کې چټک او باوري ګامونه پورته کړي.
