د ننګرهار ولایت اوسېدونکی ډاکټر غورځنګ چې تېره جمعه جلال اباد کې د خپل کار ځای ته په لاره اختطاف شوی و، خوست کې د خپلې کورنۍ غړو ته وسپارل شو.
د خوست ځایي چارواکي وایي، په دې عملياتو کې څلور تنه هغه اختطافګر چې د یاد کس له کورنۍ یې د نوموړي د خلاصون په بدل کې د ۷۰۰ زره ډالرو غوښتنه کړې وه، د استخباراتو رياست منسوبينو له خوا نيول شوي دي.
د خوست والي عبدالقیوم روحاني وايي: « د غورځنګ په نوم ډاکټر چې درې ورځې وړاندې له جلال اباد تښتول شوی و او تښتوونکو یې له کورنۍ د خلاصون په بدل کې ۷۰۰ زره ډالر غوښتل، تېره ورځ د خوست ولایت ببرک تاڼه کې وژغورل شو او تښتوونکي هم ونیول شول.»
په ورته مهال، د غورځنګ په نوم دغه ډاکټر وايې، اختطافګرو د اسختباراتو له نامه په ګټنې موټر ته پورته کړی و.
د تښتوونکو له منګولو ژغورل شوی ډاکټر وايي: « له ننګرهار یې چې څنګه راجګ کړم، په سیټ کې یې کېنولم او وویل چې ځو ریاست ته. ما ته لاره معلومه وه او پوه شوم چې ریاست ته مې نه وړي. بیا یې راته وویل چې مولوي صاحب امر کړی چې سترګې یې وتړي. بیا یې سترګې را وتړلې، لاسونه مې یې ولچک کړل او شاته یې د موټر ډالې ته واچولم.»
د ژغورل شوي ډاکټر د کورنۍ غړي وایي، تېرې څو ورځې پرې سختې تېرې شوې.
دوی له امنيتي ځواکونو مننه کوي چې په ډېره لنډه موده کې يې ورته د کورنۍ یاد غړی پيدا او سپارلی دی.
د تښتول شوي کس ورور سباوون وايي: « زموږ مور اوبه او ډوډۍ هېڅ نه خوړل، خو کله چې له خوست احوال راغی، بیا یې ډوډۍ وخوړله.»
د تښتول شوي کس ماما سردار ولي وايي: « که د دوی مرسته نه وای، د ده پیدا کول ډېر مشکل کار و. الله دې اجر ورکړي چې په ډېر کم وخت کې یې را پیدا کړ. که لږ نور وخت تېر شوی وای، دی خو به ژوند راتله که نه، خو زموږ کور کې به له غمه نور خلک مړه شوي وای.»
که څه هم ځایي چارواکي مجرمینو ته د سزا او غیر قانوني کړنو په مخنیوي کې د هڅو ډاډ ورکوي، بله خوا خلک له سرپرست حکومته غواړي چې په ورته پېښو کې ککړو کسانو ته سخته سزا ورکړل شي.
