قطر ته د افغان کارګرانو استولو لپاره د نوم لیکنې پروسه رسماً د خصوصي شرکتونو له لوري پیل شوه.
دې پروسې ته د نوم لېکنې لپاره د کابل او ولایتونو ګڼ شمېر اوسېدونکي راټول شوي دي.
متقاضیان په کور دننه د کاري فرصتونو نه موجودیت او په ګاونډیو هېوادونو کې له افغانانو سره ناوړه چلن د بېروزګارۍ او فقر دوه ستر لاملونه بولي.
دوی له سرپرست حکومته غواړي چې دا ډول پروسې دې د وړتیا، لیاقت او بشپړ شفافیت له مخې ترسره کړي.
په قطر کې کار کولو ته یو تن نوم لیکوونکی وايي: « دوه کاله سر په سر ګرځم، خو هېڅ ځای مې کار ونه موند. کسب مې هم زده دی، خو څوک کار نه راکوي.»
د قطر کارګرۍ لپاره یو بل نوم لېکوونکی وايي: « زه ډېره موده کېږي وزګار یم، هرځای چې ځم کار نه شم پیدا کولی، واسطه غواړي.»
د قطر کارګرۍ لپاره نوم لېکوونکی وايي: « یوه میاشت کېږي له ایرانه راغلی یم، اوس بېکاره یم. له اسلامي امارت غواړم موږ ته کار پيدا کړي.»
دې پروسې ته د نوم لېکنې متقاضیان وايي، لوړې زده کړې یې ترلاسه کړې دي، خو د بېروزګارۍ له امله دې پروسه ته غوښتنلیکونه سپاري.
په قطر کې کار کولو ته یو تن نوم لیکوونکی وايي: « هرځای چې د کار لپاره مراجعه کوم، وايي کاري تجربه راوړه. کله چې د کار زمینه برابره نه وي، کاري تجربه له کومه کړم. دلته تاسو وینئ چې زرګونه کسان راغلي چې د لیسانس او ماسترۍ پر کچه زده کړې لري، خو اوس کارګرۍ ته نوم لیکنه کوي. موږ له اسلامي امارت غواړو چې په کوردننه د کار زمینه برابره کړي، ترڅو خلک بل ځای لاړ نه شي.»
نوم لیکنې ته راغلی یو بل کس وايي: « څو ساعته کېږي دلته ولاړ یم، خو نه پوهېږم دا پروسه څنګه ده، بس انتظار ولاړ یم.»
د قطر لپاره د کارګرو د نوم لیکنې پروسې د شفافیت په تړاو مو د کار او ټولنیزو چارو وزارت مسوولینو سره اړیکه وکړه، خو د مکررو تماسونو سره یې ځواب را نه کړ.
د اقتصادي چارو کارپوهان وایي، د کاري زمینو برابرول د حکومتونو یو اساسي مسوولیت دی.
د دوی په خبره، اسلامي امارت دې د خلکو اقتصادي ستونزو حل کولو لپاره کاري فرصتونه ایجاد کړي.
د اقتصادي چارو شنونکی نور الله عزیز وايي: « نورو هېوادونو ته د کارګرانو استول به نه یوازې لږه اقتصادي ګټه ولري بلکې هغه فرصت به هم له لاسه لاړ شي چې دغه کسان ښايي نور افغانان وروزي. باید ووایم چې بهر ته د کارګرانو استول یو مثبت اقدام دی، خو باید په داخل کې د کار زمینه برابره شي. په دې وروستیو کې له ایران او پاکستان ډېر تخنیکي او فني کارګران هېواد ته راستانه شوي او باید ترې کار واخیستل شي.»
دا په داسې حال کې ده چې د کار او ټولنیزو چارو وزارت مسوولینو تېره ورځ په یوه خپره کړې اعلامیه کې ویلي وو چې شاوخوا ۲۰۰۰ کسان به قطر ته د کار لپاره واستول شي.
دا کسان به نږدې په ۱۴ بېلابېلو برخو لکه د برقي موټرو ترمیم، د برېښنا انجنیري، آشپزي، مالدارۍ ، صفاکارۍ او نورو کې وګومارل شي.
