د بهرنیو چارو وزارت سرپرست مولوي امیر خان متقي د روسیې بهرنیو چارو وزیر سرګي لاوروف سره د ټېلېفون پر کرښه د سیاسي اړیکو پر پیاوړتیا، اقتصادي همکاریو پر پراختیا او سیمه ییزو موضوعاتو خبرې کړې.
د بهرنیو چارو وزارت وايي، په دې خبرو کې متقي د روسیې له لوري د افغانستان حکومت رسمیت پېژندنه د دواړو هېوادونو تر منځ په اړیکو کې مهم تحول ياد کړی او په خبره يې، دې پرېکړې نه یوازې د دواړو هېوادونو تر منځ د سیاسي او اقتصادي همکاریو دروازې پرانیستې، بلکې په نړیواله ټولنه کې يې د افغانستان د ادغام په برخه کې بې ساری ګام ګڼلی.
د بهرنیو چارو وزارت مرستیال ویاند ضيا احمد تکل وايي: « د هېواد د بهرنیو چارو وزیر د روسیې فډراسیون له اړخه د افغانستان د اسلامي امارت د رسمیت پېژندنې له پرېکړې د مننې تر څنګ، دا اقدام د دواړو هېوادونو تر منځ د اړیکو په مسیر کې یو مهم تحول وباله. نوموړي څرګنده کړه چې د رسمیت له اعلان سره نه یوازې د دواړو هېوادونو ترمنځ د سیاسي او اقتصادي همکاریو دروازې پرانیستل شوې بلکې په نړیواله ټولنه کې د افغانستان د ادغام په برخه کې یو بې ساری ګام اخیستل شوی دی.»
د بهرنیو چارو وزارت د ویاند په خبره، په دې مکالمه کې د روسیې د بهرنیو چارو وزیر سرګي لاوروف ويلي، د سرپرست حکومت رسمیت پېژندنې په سیاسي، اقتصادي او نړیوالو همکاریو کې د کابل او مسکو تر منځ بې مخینې فرصتونه رامنځته کړي او دغه راز يې د نشه یي توکو قاچاق په مخنیوي او د امنیت په ټینګښت کې د سرپرست حکومت هڅې ستایلې دي.
لاوروف ټینګار کړی چې د افغانستان له حکومت سره د تعامل پراخولو لپاره سیمه ییز مکانیزمونه کلیدي ارزښت لري او په همدې تړاو یې د لا ډېرو بحثونو لپاره د مسکو فارمټ په راتلونکې غونډه کې متقي ته د ګډون رسمي بلنه ورکړې.
د بهرنیو چارو وزارت مرستیال ویاند ضيا احمد تکل وايي: « همدا راز په دې خبرو کې ښاغلي لاوروف ټینګار وکړ چې له افغان حکومت سره د تعامل پراخولو لپاره سیمهییز مکانیزمونه کلیدي ارزښت لري او په همدې تړاو یې د لا ډېرو بحثونو لپاره د مسکو فارمټ په راتلونکې غونډه کې د هېواد د بهرنیو چارو وزیر ته د ګډون رسمي بلنه ورکړه.»
د بهرنیو چارو وزارت مرستیال ویاند دغه راز وايي، د روسیې بهرنیو چارو وزیر له متقي سره خبرو کې څرګنده کړه چې د افغانستان اسلامي امارت په رسمیت پېژندنه په سیاسي، اقتصادي او نړیوالو همکاریو کې د دواړو هېوادونو تر منځ بې مخینې فرصتونه رامنځته کړي او په نږدې راتلونکي کې به یې د عملي نتایجو شاهدان اوسو.
