د ملګرو ملتونو د ماشومانو ملاتړ صندوق(یونیسف) د سمنګانو ولایت له ۴۱ زره زده کوونکو سره د کتابونو او درسي موادو مرسته وکړه.
د دې ولایت د پوهنې ریاست مسوولین وایي، د ۲۰ میلیونه افغانیو په ارزښت دا مرستې چې په کې د درسي مواد څه باندې ۱۶ زره کېټونه او ۱۹ خېمې شامل دي، د سمنګانو د زده کوونکو۵۰ سلنه اړتیا ورپوره کوي.
د سمنګان ولایت پوهنې رییس محراب الدین اقبال وايي: « د ملګرو ملتونو اړوند د یونیسف له لوري په سمنګان ولایت کې د ښوونځیو له ۴۱ زره زده کوونکو سره د ۲۰ میلیونو افغانیو په ارزښت د درسي موادو مرسته وشوه چې د زده کوونکو ۵۰ سلنه اړتیا ور پوره کوي.»
په همدې حال کې، سیمه ییز مسوولین په ښوونځیو کې د کتابونو او لازمو درسي موادو د کمښت ستونزه مني او د اسانتیاوو برابرېدو برخه کې له خپلو هڅو خبر ورکوي.
د سمنګان والي ویاند فضل الرحمن عثماني وايي: « په رښتیا هم چې د پوهنې برخه کې ستونزې شته، خو موږ هڅه کوو چې زده کوونکو ته اسانتیاوې برابرې کړو، ترڅو دوی په آرام او خوندي چاپېریال کې خپلو زده کړو ته ادامه ورکړي.»
بله خوا ښوونکي او زده کوونکي له مسوولینو غواړي چې د لرې پرتو سیمو ښوونځیو ته دې د معیاري ودانیو له جوړولو سربېره، د کتابونو او نورو اړینو تدریسي موادو مرسته هم وکړي.
د خالقیار په نوم یو ښوونکی وايي: « دا مرستې به یوه اندازه زموږ د زده کوونکو ستونزې ورحل کړي، خو بسنه نه کوي. حکومت باید د هغو سیمو ښوونځیو ته زیاته پاملرنه وکړي چې لرې دي او له هېڅ ډول مرستو او امکاناتو برخمن نه دي.»
دا مرستې په داسې حال کې ترسره کېږي چې د دې ولایت د ښوونکو او زده کوونکو په خبره لاهم ډېر زده کوونکي د معیاري ودانیو او کتابونو له نه شتوالي شکایت کوي او په ځلونو یې یادې برخې ته د مسوولینو د پاملرنې غوښتنه کړې.
