د افغانستان اوسني وضعیت ریاض اندېښمن کړی او د اسلامي همکاریو له هېوادونو یې غوښتي،چې له افغانستان سره مرستې وکړي.
د سعودي حکومت په یوه بیان کې ویلي، دا ناسته به پر مهمو اصولو باندې ګډ دریځ ته لار برابره کړي، چې پر اساس به یې د افغانستان ثبات او ملي حاکمیت یقني کړي.
د سیاسي چارو کارپوه اجمل سهیل وايي، د دې سازمان پرېکړې به عملي شي،خو په ټوله کې اوس دا ناسته د افغانستان لپاره ګټوره ده.
سهیل زیاته کړه:« دا سازمان او دې ته ورته سازمانونه د افغانستان په هکله مثبت دریځ رامنځ ته کوي بلاخره دې ته ژمن پاتې کېږي او د دې جوګه ګرځي،چې د افغانستان له خلکو سره په سختو شرایطو کې مرسته وکړي. دا یو مثبت ګام دی، موږ یې هرکلی کوو.»
د اسلامي همکاریو سازمان واک ته د اسلامي امارت له رسېدو اوس کابل سره له پيله د اړیکو پیلولو لپاره هڅې پيل کړي دي.
کارپوهان باور لري،چې د اسلامي هېوادونو سازمان به یوې اجماع ته لاره پرانیزي،خو د نوي حکومت رسمیت پېژندنه به ګران کار وي.
د سیاسي چارو کارپوه عبدالحی قانت وايي:« دغه نوې غونډه مهمه ده،چې د اسلامي همکاریو هېوادونه راغونډ شي. د افغانستان د نوي حکومت په اړه خپل فکر وکړي،اجماع رامنځ ته کړي او تعاملات پیل کړي،خو زه فکر نه کوم،چې دا ناسته دې په دې منتج شي،چې افغانستان کې نوی حکومت پر رسمیت وپېژني.»
پاکستان هم د سعودي عربستان له دې ابتکار هرکلی کړی،هغه هېواد چې د دوی په محور او ګډون تر اوسه پورې د افغانستان په تړاو یوې ناستې هم ګټورې پایلې نه دي لرلي.
