پيټر او باربي رینولډس شپږ مياشتې وړاندې په باميانو ولایت کې ونيول شول. دوی د کوچنيو کاروبارونو د ودې لپاره مشورتي او روزنيز پروګرامونه جوړول.
د برټانیا حکومت او د دوی کورنۍ د پرله پسې غوښتنو پر دوام، دا ځل ملګرو ملتونو هم د دې جوړې د ژر ازادولو غوښتنه کړې.
د ياد سازمان د بشري حقونو عالي شورا د کارپوهانو ډله وايي، د پيټر او باربي روغتيايي وضعيت ښه نه دی او له همدې کبله دې په بېړه له زندانه خوشې شي.
د بشري حقونو عالي شورا کارپوهانو ویلي: « زموږ لومړنۍ غوښتنه دا ده چې هغوی دې سملاسي د درملنې لپاره یوه ملکي روغتون ته ولېږدول شي.»
سرپرست حکومت د دې جوړې د قضيې په اړه تازه مالومات نه دي ورکړي، خو وړاندې يې ويلي وو چې له دې ښځې او خاوند يې د افغانستان د تابعيت اړوند ځينې اسناد ترلاسه شوي.
د سیاسي چارو شنونکي هم د دې بریټانوۍ جوړې قضيې د ژر رسېدنې غوښتنه لري او زياتوي، سرپرست حکومت دې د بهرنيو وګړو په توګه ورسره د اصولو له مخې چلن وکړي.
د سیاسي چارو شنوونکی شهسوار سنګروال وايي: « کوم بهرني وګړي چې افغانستان ته سفر کوي، د افغانستان حکومت مسوولیت لري چې د هغوی څارنه او پالنه وکړي او که چېرې د نړیوالو قوانینو له مخې د هغوی جرم تثبیت شي، اسلامي امارت باید د سپیناوي لپاره نړیوالو ته دا خبره په ډاګه کړي.»
ځینې نور بیا د دې بریټانويانو قضيې په بېړه د سرپرست حکومت رسېدنه د نړيوال باور ترلاسه کولو لپاره مهمه بولي.
د نړیوالو اړيکو شنونکی سمیر انګار وايي: « اسلامي امارت باید د بریټانوي بندیانو قضیه شفافه او قانوني حل کړي. که چېرې پر دوی کوم تور نه وي، ژر خوشې کول یې د نړیوال اعتماد او تعامل لپاره ګټور دي.»
دا په داسې حال کې ده چې سرپرست حکومت په افغانستان کې امنیت تامین بللی او ډاډ یې ورکړی چې هر افغان او بهرنۍ وګړی د اصولو له مخې، افغانستان ته راتلی شي او هېچاته اجازه نه ورکوي چې په دې خاوره کې داسې فعالیتونه ترسره کړي چې د افغانستان امنیت او ثبات وننګوي.
