د افغانستان لپاره د بریټانیا ځانګړي استازي د افغانستان راتلونکی په پراخو خبرو اترو پورې تړلی بولي او وایي، اړتیا ده چې په افغانستان کې ټولې غاړې په ګډه خبرې او بحثونه وکړي.
د ریچارډ لېنډ سي په خبره، دا چاره کولی شي د افغانستان د دوامداره سولې او پرمختګ سبب وګرځي.
لېنډسي په دې اړه وايي: « د بریټانیا ځانګړي استازي په توګه کابل ته له سفر راستون شوم. هلته مې د طالبانو د وزيرانو په شمول له افغانانو سره وليدل او د روغتيايي مسايلو ترڅنګ مې له ايران او پاکستانه د راستنېدونکو په اړه ورسره خبرې وکړې. د افغانستان پرمختګ لپاره اړتیا ده چې ټولې غاړې پراخې خبرې او له یو بل سره تعامل وکړي.»
ریچارډ لېنډسي چې تازه يې د افغانستان لپاره د بریټانیا ځانګړي استازي په توګه دنده پيل کړې، کابل ته له سفر بېرته بریټانیا ته ستون شوی، خو کابل کې يې د افغاني ټولنې د بېلابېلو قشرونو له استازو سره ولېدل چې په کې د سرپرست حکومت چارواکي هم شامل وو.
د هغه خبرې او بحثونه د افغانستان پر اوسني وضعیت او د بریټانیا او افغانستان ترمنځ پر دوه اړخیزو اړیکو متمرکز و.
د بریټانیا ځانګړي استازي دندې د ترهګرۍ پر ضد هڅې، د بشري حقونو ملاتړ، بشري مرستو ته د افغانانو لاسرسی او په افغانستان کې د داسې یوه حکومت د جوړېدو ملاتړ ښودل شوی چې ټول شموله او د خلکو استازی.
د چارو څارونکي بیا وایي، لوېدیځ هېوادونه له کلونو راهیسې هڅه کوي چې په افغانستان کې یوه ټول شموله حکومت ته لاره هواره شي، خو لا هم په دې برخه کې بریالي شوې نه دي.
د سیاسي چارو شنونکی معین ګل څمکنی وايي: « ښه به دا وي چې موږ وکولی شو په هېواد کې لویې جرګې جوړې کړو او په کې د نورې نړۍ د فرمایشونو پر ځای، خپلې ستونزې حل کړو؛ ترڅو د نړیوالو خولې بندې، بهانې ورکې او په رسمیت و پېژندل شو.»
د سیاسي شنونکی خلیل احمد نادم وايي: « زه وایم همه قبول او متخصص حکومت دې جوړ شي نه همه شمول، ترڅو افغانستان له دې حالته وباسي. د دې مانا دا نه ده چې باید له هر قوم استازي په حکومت کوي بلکې د هر قوم متخصصین باید په حکومت کې ځای ولري، دا د وطن لپاره ډېر اهمیت لري.»
لېنډسي یو تجربه لرونکی ډېپلومات دی چې د ۲۰۲۵ په جون کې یې خپله نوې دنده پیل کړه.
تر دې مخکې، له ۲۰۲۲ کال راهیسې د بریټانیا د بهرنیو، مشترک المنافع او پراختیایي چارو وزارت مرستیال رییس پاتې شوی دی.
په اوسنۍ دنده کې د هغه ماموریت دا دی چې په افغانستان کې له سرپرست حکومت او نورو افغان لوریو سره د خبرو له لارې د بریټانیا بنسټیزو اهدافو ته وده ورکړي.
