فراه کې د بخش اباد بند چارو پرمختګ سره په دې ولایت کې د اوبو کمښت ستونزې حل ته هیلې زیاتې شوې دي.
د دې ولایت ځایي مسوولین وایي، د بخش اباد بند چارې ۸۵ سلنه بشپړې شوې او پاتې چارې به یې هم د روان لمریزکال تر پایه بشپړې شي.
د فراه والي ویاند عبدالمالک اسامه وايي: « د بخش اباد بند یوه ستره او ملي پروژه ده چې په بشپړېدو سره به یې د اقتصاد او کرنې ودې ترڅنګ د فراه ولس ستونزې ورسره حل شي.»
په همدې حال کې د فراه اوسېدونکي دلته له هوا ګرمېدو سره د اوبو کمښت ته اندېښمن دي او له مسوولینو غواړي چې یاده برخه کې جدي ګامونه پورته کړي.
د فراه اوسېدونکی عبدالغني وايي: « تاسو په خدای باور وکړئ په ما باور مه کوئ، پرون یو کس کور په کور د یوه پتک سره اوبو پسې ګرځېده. په خدای یو پتک اوبه چا نه درلودې چې ور یې کړي، درې ورځي ما هلته کارګر درلود، هېڅ اوبه نه وې آخر مې کار بند کړ.»
د فراه اوسېدونکی وهاج وايي: « فراه ښایسته ولایت دی خو د اوبو مشکلات په کي زیات دي. ستونزه داده چې ګرمې هم ډېره زیاته ده او خلکو ته په کې د څښاک اوبه نه پیدا کېږي. چارواکي باید د اوبو غمه وخوري چې خلکو ته اوبه پیدا شي.»
د فراه اوسېدونکی شراف الدین وايي: « د څښاک اوبو برخه کې ستونزې ډېرې دي، بخصوص دوبي کې اوبه ډېرې لږ دي. تابستان کې څاه ګانې وچیږي، څوک چې اوبه لري هغوی هم نه شي کولی خپلو ګاونډیانو ته اوبه ورکړي.»
د فراه خلک وايي، که مسوولین یادې برخې ته پاملرنه ډېره نه کړي او د بخش اباد بند ژر تر ژره بشپړ نه کړي، وېره شته چې راتلونکو کالونو کې د وچکالۍ له امله دې ولایت کې کروندګر د اوبو کمښت له امله له ګڼو ستونزو سره مخ شي.
