د ازموینو ملي ادارې د ۱۴۰۴ هجري لمریز کال د کانکور ازموینې پایلې د يکشنبې پر ورځ د یوې غونډي په لړ کې اعلان کړې.
د ریاست الوزرا اداري مرستیال په همدې مناسبت جوړې شوې غونډې ته خبرو کې وویل، له نړۍ سره د سالمې سيالۍ لپاره یوازینۍ لاره زده کړې دي او په خبره يې، ځوانان دې بهر ته د کډوالۍ پر ځای په کوردننه لوړې زده کړې وکړي.
د ریاست الوزرا اداري مرستیال عبدالسلام حنفې وايي: «هغه زده کوونکي یا محصلین چې د ۱۴۰۴ کال په کانکور ازموینه کې بریالي شوي او لوړې نمرې یې اخیستې دي، زه دوی ټولو، د دوی کورنیو، استادانو او د افغانستان ټول ملت ته د زړه له تله مبارکي وایم.»
په ورته مهال، د ازموینو ملي ادارې چارواکي وايي، سږ کال د کانکور ازموینې داوطلبان د تېر کال په پرتله ۲۰ زره تنه زیات وو او دا زده کړو ته د ځوانانو د علاقمندۍ د زياتوالي ښکارندويي کوي.
د دې ادارې سرپرست عبدالباقي حقاني له ځوانانو او کورنیو وغوښتل چې خپل اولادونه د علم په ګاڼه سمبال کړي او بې تعلیمه يې پرې نږدي.
حقاني په دې اړه وايي: « دا امانت په داسې ډول سپارل کېږي چې الحمد الله په دې کې ځوانان هم تشویش نه لري، نظام هم تشویش نه لري او والدین هم تشویش نه لري. موږ چې کوم ترتیب ورته برابر کړی، هغه ټولو ته د قناعت وړ دی. موږ ډېره هڅه کړې چې د ولس بچي تر ډېره حده کامیاب شي، سهولتونه ورته برابر شي، پوښتنې یې ساده او اسانه جوړې شي.»
د کانکور په سږنۍ ازموینه کې ټولټال شاوخوا ۱۰۵ زره کسانو ګډون کړی وو چې د چارواکو په خبره، له ډلې يې ۹۶ سلنه لوړو او نیمه لوړو زده کړو ته بریالي شوي دي.
د چارواکو په خبره، تېرو کلونو ته په کتو، سږ کال پوهنتونونو ته د محصلانو د جذب ظرفيت لوړ شوی او د کانکور کم شمېر ګډونوال بې پایلې پاتې شوي دي.
د ازموینو ملي ادارې سرپرست عبدالباقي حقاني زیاتوي: « سږ کال د تېر کال پرتله څه باندې ۲۰ زره ګډونوال زیات وو. دا د دې خبرې دلیل دی چې زموږ له ځوانانو سره د علم زده کړې شوق او دلچسپي شته. همدارنګه له ولس سره هم لېوالتیا شته چې خپل بچي د علم زده کړې ته استوي.»
په سږنې کانکور کې د کابل اوسېدونکی سید موسی د سید داوود سادات زوی د ۳۵۶ نمرو په اخیستلو سره عمومي اول نمره اعلان شو.
