د افغانستان په تړاو د ناټو سازمان پرله پسې ناستو سربېره، د اروپايي ټولنې، ملګرو ملتونو او همدا راز د سیمې او ګاونډیانو په کوربتوب ترسره شوې ناستې هغه څه دي،چې سیمه او نړۍ د افغانستان په تړاو اندېښنه لري او د حل لپاره یې لارې چارې لټوي.
دغو ناستو نه ښکاري،چې د افغانستان په تړاو د سیمې او نړۍ دریځ یو دی،خو دغو هېوادونو تر اوسه پورې د افغانستان له اوسني حکومت سره په مستقیم ډول خپلې غوښتنې او اندېښنې نه دې شریکې کړي .د سیاسي چارو یو نور کارپوهان بیا وايي، اسلامي امارت نړۍ ته ګواښ نه دی، بلکې په اوسنیو شرایطو کې افغان ولس له ستونزه سره مخ دی او نړیوال باید د افغانانو د ستونزو د حل لپاره کوټلي ګامونه واخلي.
د سیاسي چارو کارپوه اسدالله ندیم وايي:« په حقیقت کې د طالبانو حکومت هېڅ ډول ستونزه نړیوالو ته نه پیښوي،بلکې د افغانستان خلک له یو ډول ګواښ سره مخ دي او له یوې نړۍ ستونزو سره لاس او ګریوان دي. نړۍ باید د افغانستان د خلکو د ستونزو په حل کې مرسته کړي.»
کارپوهان وايي، د امریکا پر مشرۍ نړۍ په افغانستان کې خپل زور ازمایلی دی اواوس له انعطاف پرته بله هېڅ چاره نه لري، خو له افغان لوري سره به یې مشترک ټکي ته رسیدل وخت ونیسي.
د سیاسي چارو کارپوه عبدالستار سعادت وايي:« نړۍ خپل زور ازمایلی دی او له دې وروسته به په نرمه توګه له افغانستان سره مخ پر وړاندې ځي او افغان چارواکو سره به یوې مشترکې نقطې ته ورسیږي،خو فکر کوم چې دا به خت ونیسي.»
تازه ناټو اعلان کړی دی،چې درې ورځې وروسته به د دغه سازمان د بهرنیو چارو وزیرانو پر کچه ناسته جوړه کړي او دغه ناسته کې به په افغانستان کې د ناټو سازمان پوځي ماموریت پیل او پای په تړاو بحثونه وشي او ناټو به دغه ماموریت د ځان لپاره یو ستر درس وګڼي.
له بل لوري بیا د کابل او واشنګټن ترمنځ د مذاکراتو لپاره افغان او مریکايي پلاوي د قطر پلازمینې دوحې ته رسیدلي دي،خو لا تر اوسه پورې رسمي مذاکرات نه دي پیل او نه هم په دې تړاو جزئیات وړاندې شوي دي.
