د دولتي ادارو د یو کلنو لاسته راوړنو د تشرېح لړۍ پیل شوه. په دې لړۍ کې به ټولټال ۴۴ ادارې چې وزارتونه او لوی ریاستونه په کې شامل دي، خپلې یو کلنې لاسته راوړنې له ولس سره شریکې کړي.
د ریاست الوزرا د دفتر رییس داکټر عبدالواسېع خادم وايي، د دې پرګرام موخه دا ده چې د دولتي ادارو مسوولین د تېر یوکال اجرااتو راپور په پوره روڼتیا، له ولس سره شریک کړي.
د خادم په خبره، سرپرست حکومت په تېرو څلور کالو کې ګڼې لاسته راوړنې لري، خو ځينې بهرنۍ رسنۍ او بنسټونه هڅه کوي حقایق پټ وساتل شي او نړۍ ته د اسلامي امارت حکومت منفي انځور وښي.
د ریاست الوزرا د دفتر رییس له رسنیو وغوښتل چې واقیعتونو ته انعکاس ورکړي او د افکارو د سمې رهبرۍ لپاره له سرپرست حکومت سره مرسته وکړي، ترڅو نړۍ د افغانستان اصلي نځور وویني.
خادم په دې اړه وايي: « تاسو پوهېږئ چې په تېرو څلورو کالو کې د پام وړ پرمختګونه شوي، خو له بده مرغه ځینې بهرني نهادونه او رسنۍ هڅه کوي چې حقایق پټ او د هېواد منفي انځور نړۍ ته وړاندې کړي. دا ستاسو مسوولیت دی چې واقعیتونه انعکاس کړئ او د افکارو د رسمي رهبرۍ لپاره له موږ سره مرسته وکړئ؛ ترڅو نړۍ د افغانستان ریښتینی تصویر درک کړي.»
د ریاست الوزرا د دفتر رییس دغه راز وايي، سرپست حکومت د اسلامي اصولو په چوکاټ کې د بیان ازادۍ ته درناوی لري او د رسنیو له فعالیت ملاتړ کوي.
د ده په خبره، هڅې کېږي چې ریښتینو او واقعي مالوماتو ته د لاس رسي کچه لوړه شي.
د ریاست الوزرا د دفتر رییس په دې اړه وايي: « د اسلامي اصولو په رڼا کې د بیان آزادۍ ته د درناوي او د رسنیو د فعالیتونو ملاتړ، د اسلامي امارت له ارزښتناکو هڅو دي. رسنۍ د ولس او حکومت ترمنځ د ارتباطي پل حیثیت لري. هڅه کوو چې ریښتینو مالوماتو ته د لاسرسي کچه لوړه کړو.»
داکټرعبدالواسیع دا هم وویل چې د اسلامي امارت حکومت له ۴۰ زیاتو هېوادونو سره په بېلابېلو برخو کې تعامل لري او په نږدې راتلونکي کې به ګڼ شمېر نور هېوادونه هم د روسیې په څېر د اسلامي امارت حکومت پر رسمیت وپېژني.
