کورنیو چار وزارت د ځینو رسنیو له خوا هغه خبرونه تبلیغات بولي چې وايي، د دې وزارت سرپرست خلیفه سراج الدین حقاني په دري ژبه د مکتوبونو د لیکلو بندیز او یوازې په پښتو ژبه د لیکلو حکم کړی.
د یاد وازرت ویاند شمشاد ته په رالیږلي پيغام کې ځينې رسنۍ ننګولې دي چې نفاق ته لمن وهي او شایعات خپروي.
د کورنیو چارو وزارت ویاند عبدالمتین قانع زیاتوي: « په دې اړه چې وايي د کورنیو چارو وزارت سرپرست خلیفه سراج الدین حقاني دې امر صادر کړی وي چې له دې وروسته به ټول مراسل او مکاتب په پښتو ژبه وي نه په فارسي، موږ دا موضوع په کلکه ردوو او واقعیت نه لري. دا د ځینو مغرضو رسنیو تبلیغات دي چې غواړي د ملت اتحاد سره وپاشي. دا د دوی شخصي افکار دي، خو باید ووایم چې د کورنیو چارو وزارت ټول رسمي مکاتب او مراسل په دواړو ملي او رسمي ژبو دي او اکثریت برخه یې په فارسي لیکل کېږي.»
تېره ورځ ځينو رسنیو خبر خپور کړ چې ګواکې د کورنیو چارو وزارت پرته له بدخشان، پنجشیر او بامیان ولایتونو څخه په نورو ټولو ولایتونو کې په دري ژبه د رسمي مکتوبونو لیکل منع کړي دي.
د کورنیو چارو وزارت ویاند عبدالمتین قانع وايي، د کورنیو چارووزارت ټول مکتوبونه په ملي ژبو دري او پښتو دواړو لیکل کېږي او په دې تړاو خپاره شوي خبرونه بې اساسه دي.
