د اطلاعاتو او کلتور وزارت د يوې موسسې په ملاتړ او همکارۍ د کابل په ۱۲ مه ناحيه کې د عامه کتابتون په چوکاټ کې د ماشومانو لپاره ځانګړې څانګه فعاله کړه.
د دې وزارت چارواکي د مطالعې ارزښت ته په اشارې د يادې موسسې همکاري ستايي او زياتوي، دې موسسې نه يوازې په کابل بلکې په ځينو ولايتونو کې هم له اطلاعاتو او کلتور وزارت سره په همغږۍ د ښوونځيو او کتابتونونو په جوړولو کې همکاري کړې.
د دوی په خبره، وزارت يې د بسپنه ورکوونکو په همکارۍ په دې هڅه کې دی چې د عامه پوهاوي لوړولو په موخه د کابل په ټولو ناحيو کې کتابتونونه جوړ کړي.
د اطلاعاتو او کلتور وزارت د هنر او فرهنګ معين عتیق الله عزیزي وايي:« د شانتي موسسې له چلوونکو مننه کوو چې نه یوازې دلته په مرکز کې د دې ډول خدمتونو او ابتکاراتو کوربه توب کوي بلکې په ولایتونو کې یې هم د ځپل شویو ماشومانو او مظلومو پرګنو لاسنیوی کړی.»
په ورته مهال، د دې وزارت ځينې نور چارواکي وايي، تازه د عامه کتابتون په چوکاټ کې د ماشومانو لپاره پر فعالې شوې څانګې د همکارې موسسې له لوري ۲۰ زره امریکايي ډالر لګول شوي چې په کې د ماشومانو او له زده کړو محروم کړای شویو نجونو لپاره ټولې اسانتياوې برابرې شوې دي.
د اطلاعاتو او کلتور وزارت د عامه کتابتونونو ریيس نعمت الله منتظر وايي: « په دې کتابتون کې له موږ سره د شانتي رضاکاره ټولنې د ۲۰ زره ډالرو مرسته کړي چې د دې کتابتون په رنګولو او الماریو جوړولو لګول شوي او پاتې لګښت یې اطلاعاتو او کلتور وزارت کړی. هغه ماشومانې نجونې چې مکتب ته لاسرسی نه لري یا نه شي تللی، هغوی ته مو دلته مجرب استادان مصروف کړي دي.»
په ورته مهال د همکارې موسسې مسوولین وايي، تېرو دوو لسيزو کې يې د ټول هېواد پر کچه له ۵۰ بابه ډېر ښوونځي او کتابتونونه جوړ کړي او په خبره يې، اوس په پام کې لري چې د کابل په اتمه ناحيه کې هم د اطلاعاتو او کلتور وزارت په همکارۍ د عامه کتابتون څانګه پرانيزي.
د موسسې مسوول جاوید ساپی وايي:« موږ اطلاعاتو او فرهنګ وزارت ته ژمنه ورکوو چې په راتلونکي کال کې به د کابل په اتمه ناحیه کې یو داسې عصري او بنسټیز کتابتون جوړ او په وسایلو سمبال کړو چې شاید په ساحه کې به یو نمونه يي کتابتون وي. همدارنګه به د کابل په څلورو نواحیو کې خپلو فعالیتونو ته ادامه ورکړو.»
له بلې خوا، د عامه کتابتون مسوولین وايي، په دې کتابتون کې د لويانو او ماشومانو لپاره زرګونه ټوکه کتابونه د مطالعې لپاره اېښودل شوي دي.
د کابل په۱۲ ناحيه کې د عامه کتابتون مدير حمیدالله امیرزی وايي:« موږ په دې کتابتون کې تقریبا ً ۶ زره ټوکه کتابونه د لویانو او ۲ زره ټوکه کتابونه هم د ماشومانو لپاره لرو چې ډېری یې د کیسو کتابونه دي.»
ماشومان هم د دوی لپاره د ځانګړې څانګې له پرانيستل کېدو خوښ دي او له خپلو همځولو غواړي چې کتابونه مطالعه کړي.
د کابل اوسېدونکې ماشومه اطهر وايي: « زه ډېره خوشاله یم چې راځم او په دې کتابخانه کې درس وايم.»
د کابل اوسېدونکی ماشوم یوسف وايي: « زه نورو ماشومانو ته وایم چې په کوڅو کې لوبې ونه کړي بلکې دلته راشي او کتابونه ووايي.»
د کابل په ۱۲ مې ناحيې کې د عامه کتابتون مسوولینو د مالوماتو له مخې، دې څانګې ته هره ورځ له ۱۲۰ تر ۱۴۰ تنو ماشومان او ۴۰ تنه لويان د مطالعې لپاره ورځي.
