د امریکا ولسمشر ډونالډ ټرمپ د ټاکنیز کمپاین پرمهال او بیا واک ته له رسېدو وروسته، څو څو ځله د بګرام پوځي اډې په تړاو څرګندونې وکړې او ادعا کوي چې د امریکايي ځواکونو دغه ستره پخوانۍ پوځي اډه، دامهال د چین له لوري اداره کېږي.
نوموړي په ټاکنو کې له بریا وروسته د روان کال د فبرورۍ پر ۲۶مه د کابینې په لومړۍ ناسته کې په افغانستان کې د پاتې پوځي تجهیزاتو د بېرته ترلاسه کولو خبره هم کړې وه او پر دې سربېره یې د ځانګړي سټراټیژیک موقعیت له مخې، د بګرام ستره پوځي اډه په نړۍ کې غوره هغه بللې چې په وینا یې، دامهال د چین له لوري کنټرولیږي.
د امریکا ولسمشر ډونالډ ټرمپ ویلي: « بګرام اډه یوازې د افغانستان لپاره مهمه نه ده بلکې دا هغه ځای دی چې له چین سره یوازې یو ساعت هوايي واټن لري، چېرته چې دا هېواد خپل اټمي توغندي جوړوي. د بګرام پوځي اډې واټن دومره کم دی. دا په نړۍ کې یوه له غوره پوځي اډو ګڼل کېږي. هغه اډه چې د ځانګړي کانکرېټي جوړښت له کبله هر ډول الوتکې په کې ناسته او ولاړه کولی شي. خو موږ څه وکړل؟ موږ دغه اډه پرېښوده او اوس چین اشغال کړې ده.»
له امریکا سره د سرپرست حکومت د سولې ۱۸ میاشتنیو مخامخ خبرو اترو پرمهال په افغانستان کې د بشپړ پوځي حضور پای او د بګرام په شمول د ټولو پوځي اډو تخلیه د سولې مذاکراتو اصلي برخه وه چې د تېر جمهوري نظام له پرځېدو سره هم مهاله، د ۲۰۲۱زېږدیز کال د اګست په ۳۱مه د وروستي امریکايي پوځي تر وتلو وروسته یې واک په بشپړ ډول د سرپرست حکومت لاس ته ولوېد.
زلمی خلیلزاد چې د امریکا د ځانګړي استازي په توګه یې له اسلامي امارت سره د سولې خبرې مخ ته وړلې، اوس په تازه ټویټ کې د چین له لوري د بګرام پوځي اډې اداره کېدل رد کړي او له حقیقته یې لرې بولي.
خلیلزاد زیاته کړې: « زه باور لرم دا راپور چې کمونېست چین اوس د بګرام سټراټیژیکه هوايي اډه اداره کوي، حقیقت نه لري.»
بګرام د هېواد په شمال کې هغه پوځي اډه ده چې له ۲۰۰۱زېږدیز کال تر ۲۰۲۱زېږدیز کاله پورې امریکا د افغانستان د تېرې ۲۰ کلنې جګړې د رهبرۍ او قوماندې د اصلي مرکز په توګه ترې کار اخیست.
دغه پوځي مرکز د خپل جغرافیايي موقعیت له مخې نه یوازې د افغانستان د امنیتي وضعیت د کنټرول بلکې پر خپلو دوو اصلي سیالانو چین او روسیې د څار له کبله ځانګړی ارزښت درلود.
د سیاسي چارو شنونکی واحد فقیري وايي: « د ښاغلي ټرمپ دا خبرې چې په بګرام هوايي اډه کې چینایان مېشت وي او دا اډه امریکا ته ډېر زیات اهمیت لري، تر ډېره حده بابېزه او بې بنیاده خبرې دي. په دې اړه هېڅ ډول شواهد نه دي وړاندې شوي؛ دا خبرې د دې لپاره کوي چې خپل پخواني حریفان که دا ډیموکراټان دي که بایډن دی، هغوی وټکوي.»
دا په داسې حال کې ده چې له دې وړاندې اسلامي امارت په وار وار د بګرام په تړاو د ډونالډ ټرمپ څرګندونې رد کړې دي او د نوموړي شخصي باور او انګېرنه یې ګڼي چې په هېڅ ډول واقعیت نه لري.
سرپرست حکومت ډاډ ورکړی چې افغانستان یو واحد او خپلواک هېواد دی او هېڅکله د بل هېواد پوځي حضور ته اجازه نه ور کوي.
