Skip to content
په سوېل پکتیا ولایت کې د دیني مدرسو یو شمیر زده کوونکي وایي، د عصري علومو له لوست پرته یې دیني زده کړې نیمګړې دي او له اسلامي امارته غواړي،چې عصري علوم د مدرسو په نصاب کې شامل کړي.
پکتیا زرمت ولسوالۍ د دیني مدرسې یو تن زده کوونکی وايي:« موږعصري زده کړو ته اړتیا لرو. د بېلګې په ډول که ریاضي مو زده نه وي، د میراث په برخه کې به له ستونزو سره مخ یو.»
د پکتیا زرمت ولسوالۍ د دیني مدرسې یو بل زده کوونکی وايي:« عصري زده کړو ته په ښوونځيو او مدرسو دواړو کې ډېره اړتیا ده. له اسلامي امارته مو غوښتنه دا ده،چې عصري علوم د مدرسو په نصاب کې شامل کړي.»
دیني عالمان مدرسو کې د عصري علوم تدریس د وخت غوښتنه بولي او له اسلامي امارته غواړي،چې د مدرسو نصاب کې یې شامل کړي.
یو تن دیني عالم وايي:« عصري علومو ته اړتیا ده. ډېره اړتیا ده. اسلامي امارت باید دې ته جدي پاملرنه وکړي. اوس الحمد الله اسلامي امارت په پوځي ډګر کې بریالی دی. اقتصادي او سیاسي ډکر هم باید بریالی شي.»
د پکتیا مرستیال والي عزیزالرحمن منصور وایي،اسلامي امارت په پام کې لري،چې مدرسو کې د عصري علومو تدریس پیل او دغه علوم د مدرسو په نصاب کې شامل کړي .
د دیني مدرسو زده کوونکي همدا راز له اسلامي امارته غواړي،چې پر کور دننه دې د هر راز دیني او عصري زده کړو زمینه ورته برابره کړي،ترڅو ګاونډیو هېوادونو ته د تګ اړتیا پاتې نه شي.
