د اسلامي امارت مرستیال ویاند د هرات اسلام کلا بندر کې د خبري کنفرانس پرمهال له افغان کډوالو سره د ایراني ځواکونو پر چلن نیوکه کړې.
حمدالله فطرت وایي، له افغان کډوالو سره د ایراني ځواکونوعمل ناسم او ناوړه دی او ایران دې د اسلامي او ګاونډیتوب اصولو پر بنسټ د افغان کډوالو سره چلن وکړي.
فطرت زیاتوي: « موږ د ایران اسلامي جمهوریت پر مسوولینو او ټولو دا غږ کوو چې دوی دې افغانانو سره انساني او اسلامي چلن وکړي، اوسنی چلن چې روان دی، دوی په بدو حالاتو کې اخراجیږي؛ دا دې ودروي او د اسلامي او ګاونډیتوب اصولو له مخې دا چې دوی ۴۰ کاله د هغوی کوربه توب کړی و، د هغوی اختتام دې لا ښه وکړي.»
فطرت همداراز وايي، ایران کې د افغانانو پاتې شتمنیو رالېږدولو په موخه د صنعت او سوداګرۍ وزارت تر مشرۍ لاندې کمېټه جوړه شوې او له ډېپلوماټیکو لارو به د افغانانو شتمنۍ هېواد ته راولېږدوي.
فطرت په دې اړه وايي:« هغوی هلته کار کړی، مزدوري یې پاتې ده. د تجارانو له جملې چې هلته یې کاروبارونه او جایدادونه درلودل، هغه پاتې شوي دي او په دې مورد هم کمیسیون کې یو کمېټه ده چې د صنعت او سوداګرۍ پر مشرۍ نورې ادارې هم په کې دي. دوی کوښښ کوي چې د ایران له اسلامي جمهوریت سره دا موضوع د ډېپلوماټیکو لارو جدي تعقیب کړي او یوې نتیجې ته ورسیږي.»
بله خوا له ایرانه راستانه شوي کډوال د ایراني ځواکونو ناوړه چلن څخه شکایت سره وایي، ایران کې یې د شتمنیو پاتې کېدو سربېره، د لارې په اوږدو کې په بېلابېلو پلمو ورڅخه میلیونونه تومانه پیسې اخیستل شوې دي.
له ایرانه ایستل شوی افغان محمد شفېع وايي:» هلته افغانانو باندې ډېر ظلم او ستم دی، زموږ هر یوه ۲۰۰ تر ۳۰۰ میلیونو تومانه پاتې شوي. خروجي یې ووهله او راته یې وویل چې پیسې نه شته. پرون تازه را ورسېدو، لاره کې یې هم له زموږ زیاتې پیسې واخیستې، حتا د شیر خوار ماشوم پر سر یې هم پیسې واخیستې.»
له ایرانه ایستل شوی افغان داد خدا وايي: « ټول افغان کډوال یې چور کړل، زموږ له اسلامي امارت دا هیله ده چې باید خپل غږ پورته کړي، ځکه افغان کډوالو ډېر رنج لیدلی.»
دا په داسي حال کې ده چې تېرو ۱۸ ورځو کې څه باندې۴۵۰ زره افغان کډوال د اسلام کلا پولې له لارې هېواد ته راستانه شوي چې ډېری هغه یې د ایران له خوا پر زور ایستل شوي.
