د بلخ ولایت ځايي چارواکي وايي، د ریاست الوزرا د حکم له مخې په دې ولایت کې د سوداګرۍ او پانګونې خونې لپاره یو لړنوې ټاکنې وشوې، ترڅو له بهر څخه پانګوال راجلب شي، د سوداګرۍ په برخه کې شته ستونزې حل او د سیمې اقتصادي پیاوړتیا نوره هم تامین شي.
د بلخ ولایت مقام وياند عطاءالله زید وايي: « د۲۱ اعضاوو په لرلو سره نن د مسوولینو په حضور کې معرفي شو. دا کار په بلخ ولایت کې د تجارانو د مشکلاتو پر حل او ستونزو ته د رسېدنې په موخه تر سره شو چې له دې وروسته به په وخت د دوی ستونزو ته رسېدنه کېږي.»
د پلان مطابق ٢١ مسلکي او متشبث کسان د سوداګرۍ او پانګونې خونې غړي وټاکل شول، ترڅو د پانګوالو ستونزو ته حل لارې ولټوي، له بهرنیو پانګوالو سره اړیکې پراخې کړي او د بلخ ولایت سوداګریز ظرفیتونه نړیوالو ته ور وپېژني.
د افغانستان سوداګرۍ او پانګونې خونې مرستیال خیرالدین مایل وايي: « دلته هغه سوداګر ګومارل شوي چې په دې برخه کې یې د خدمت کولو وړتیا لرله. دا ځل هم داسې کسانو ته مسوولیت ورکړل شوی. زه امید لرم چې د پانګونې او سوداګرو ملاتړ کې به مثبت تغییرات را ولي.»
د بلخ سوداګرۍ او پانګونې خونې نوی رییس سید کریم هاشمي وايي: « زما او د نوي ټاکل شوي ټیم ژمنه ده چې ولس او پانګوالو ته خدمت وکړو. د سوداګرو ملاتړ برخه کې مو چې څه وس وي نه یې درېغوو. دا چې مخکې هم د خلکو په خدمت کې وو، اوس هم چې مسوولیت را کړل شو، دوه برابره به خدمت کوو.»
د بلخ د سوداګرۍ او پانګونې خونې مسوولين وایي، هڅه کوي چې د پانګوالو لپاره د باور فضا رامنځته کړي، د پانګونې خوندي چاپېریال برابر کړي او د صادراتو او وارداتو په برخه کې نوې اسانتیاوې رامنځته کړي.
دوی د ټاکنو هرکلی کوي او وایي، د نوې رهبرۍ له لارې به د بهرنیو پانګوالو جلب، د تولید کچې لوړول، د فابریکو پراخول او د سیمه ییزو توکو بازار موندنه ممکنه شي.
د بلخ سوداګرۍ او پانګونې خونې لومړی مرستیال مومن ضیایي وايي: « دا د سوداګرو او ولایت مقام اعتماد وو چې موږ یې د مسوولیت وړ وبللو، خپل بنده ګي کوشش کوو؛ ترڅو د سوداګرو ستونزې پر ګډه حل کړو.»
د بلخ سوداګرۍ او پانګونې خونې د مدیریتي پلاوي غړی مصطفی مومند وايي: « موږ له دې وروسته پلان لرو چې له دې وروسته د پانګونې برخه کې د شمال زون پر کچه لوی بدلون راولو. زموږ پلان به لومړی دا وي هغه سوداګر چې بهر له هېواده یې پانګونه کړې، هېواد ته رابولو چې افغانستان کې اوس پانګونې ته زمینه برابره شوې. الحمدالله په امنیت او ورته نورو برخو کې ډېر تغییرات راغلي.»
ټاکل شوې ده د بلخ سوداګرۍ او پانګونې خونې نوی مشر به راتلونکي اوونۍ د یوه منظم پلان له مخې د پانګونې هڅو ته دوام ورکړي او له اړوندو ادارو سره به همغږي لا پیاوړې کړي.
