Skip to content
د افغان ماشومانو لپاره د جرمنې مرستو کمېټې مشر محمد عالم شهاب نیوکه کوي،چې ملګري ملتونه او نړیوال د بې وزلۍ په اړه ارقام د میلیونونو وګړو خپروي، خو مرستې بیا لسګونو سره کوي.
دغه کمېټه وایي، نړیوال باید لاس په کار شي،چې مرستې وکړي او هغه لارې چارې ولټوي چې ستونزه حل کړي، نه چې شعارونه ورکړي.
شهاب زیاته کړه:« تر شااوخوا درې یا څلور میاشتې مخکې پورې همدغه ملت او خلک لامل څه چې مرستې کېدې، اوس په کې هېڅ فرق نه دی راغلی،خو فقر او بیچاره ګي زیاته شوې، اما نن نړیوالو، سفارتونو او نورو مؤسسو ځانونه اېستلي دي، ولې؟ خلک نن مرستو ته اړتیا لري او ستاسې ارقام هېڅ ګټه نه لري.»
شهاب وایي،په کابل کې یې ۵۰۰ کورنیو ته د شااوخوا ۱۸ زره ایرو په ارزښت مرستې ووېشلې.
اخوا بیا په کابل کې د مهاجرینو ریاست مشر مولوي عبدالمتین رحیمزی وایي، داخلي بې ځایه شوي په ۴۸ کمپونو کې پراته دي او د ژمي په را رسېدو سره یې د امید سترګې نړیوالو ته دي،خو نړیوال هغسې مرستې نه کوي،چې د بې وزلو درد پرې دوا شي.
رحیمزي زیاته کړه:«دلته اوس ۴۸ کمپونه موجود دي،چې دا ټول بې ځایه شوې دي او شااوخوا لس زره کورنۍ دي او کوم چې په دې لنډ وخت کې تحولاتو کې رابې ځایه شوي دي، هغه موږ تر پنځه زرو کورنیو بېرته انتقال کړي دي.»
په دغه مرستو کې اوړه، وریژې،غوړي،چای،بوره او لوبیا شاملې دي،چې د یوې منځنۍ کورنۍ د یو څو ورځو لپاره بسنه کوي.
