د افغانستان او پاکستان بهرنیو چارو وزارتونو استازو د دوشنبې په ورځ د دواړو هېوادونو د ګډو سیاسي، اقتصادي او ټرانزیټي همکاریو په اړه، د سیاسي مشورتي مکانېزم لومړی پړاو ناسته ترسره کړي.
د بهرنیو چارو وزارت مسوولین وايي، په دې ناسته کې له پاکستاني چارواکو سره د سیاسي او اقتصادي مسایلو ترڅنګ د بندیانو او کډوالو پر وضعيت او دغه راز ناروغانو او سوداګرو ته د وېزو پر اسانولو بحثونه شوي.
د دغه وزارت مرستیال ویاند احمد ضیا تکل وايي، دې ناسته کې پر سیمه يیز ثبات او د دوه اړخیزو امنیتي همکاریو پر پيلولو هم ټینګار شوی.
تکل په دې اړه وايي: « دواړو لوریو په دوه اړخیزو سیاسي مسایلو سوداګرۍ، ټرانزیتي همکاريو او سیمهییز اتصال خبرې وکړې. همدا ډول په سیمه ییزو او نړیوالو سیاسي مسایلو هم د نظر تبادله وشوه.»
د پاکستان د بهرنیو چارو وزارت هم په ورته څرګندونو سره اعلاميه خپره کړې او ویلي يې دي، د دې ناستو لړۍ کابل ته د ياد هېواد د بهرنیو چارو وزیر اسحق ډار له سفر وروسته پيل شوې.
په اعلامیه کې راغلي، دواړه هېوادونه به په راتلونکې کې د یاد مکانېزم نورې مشورتې ناستې هم وکړي.
آزاد خبریال طاهر خان وايي: « زما اکثریت دا نظر وي چې مذاکرات، خبرې اترې، ډیالوګ او دا ډول مکانیزمونه باید وي او له دې لارې د کابل او اسلام اباد د تشویشونو هواری کېږي، بله لار نه شته. د زرو لارې، د طاقت د استعمال لارې او په رسنیو، سیمه ییزو او نړیوالو فورمونو کې پر یوبل تورونه لګول د ستونزو حل نه دی، بلکې ستونزې لا پېچلې کوي او بې اعتمادي رامنځته کوي. کله چې اعتماد وي، خبرې او مذاکرات وي، نو د ستونزو حل ته لارې پيدا کېږي.»
د اقتصادي چارو شنونکي ادعا کوي چې پاکستان تل افغان سوداګرو ته دوامداره ستونزې ایجاد کړې او دې ته په پام وايي، دا هېواد له افغانستان سره د اقتصادي او ټرانزیټي همکاریو په برخه کې هېڅکله د ثبات او باور فضا نه ده رامنځته کړې.
د دوی په خبره، د اسلام اباد دې غلطو پالیسو له امله د دواړو لوریو سوداګر سخت زیانمن شوي دي.
د اقتصادي چارو شنونکی عبدالنصیر رشتیا وايي: « زه فکر کوم له اوږدو کالو راهیسې پاکستانیانو په خپلو کړو ژمنو عمل نه دی کړی او هر وخت د تجارت پر وړاندې ستونزې رامنځته کوي. همدا لامل دی چې افغانستان پر بدیلو لارو فکر وکړ او له پاکستان سره د افغانستان سوداګرۍ په شدت کمه شوه. که پاکستانیان په خپلو خبرو او ژمنو عمل وکړي، دا به هم د افغانستان او هم د پاکستان په ګټه وي.»
د راپورونو پر بنسټ، د افغانستان او پاکستان ترمنځ د سیاسي مشورتي مکانېزم لومړي پړاو ناسته داسې مهال کېږي چې پاکستان افغان سوداګرو ته له افغانستانه د تازه مېوو او نورو توکو پر صادراتو مالیې زیاتې کړې او په دې توګه يې د افغانستان صادراتو پر وړاندې خنډونه ايجاد کړي دي.
