اوچا: افغانستان کې خپلو اصلي مېنو ته د بې ځایه شویو ستنېدل زیات شوي

د ملګرو ملتونو د بشري مرستو د همغږۍ ادارې یا اوچا ویلي،روان میلادي کال کې د شپږ سوه او اته شپېته زره بېځایه شویو کسانو له ډلې یو ۱۶۹ زره یې بېرته خپلو مېنو ته ستانه شوي دي.

اوچا ويلي، ځینې کسان په داسې حال کې خپلو مېنو ته ستنېږي،چې کورونه او جایدادونه یې په وروستیو جګړو کې تخریب شوي هم دي او دغه کسان نورو مرستو ته اړتیا لري.

تر دې وړاندې په یو شمېر ولایتونو کې د نا امنیو له کبله خلک کابل ته راکډه شوي وو، چې اوس د امنیت په ښه کېدو سره ټول غواړي،بیرته خپلو اصلي مېنو ته ستانه شي.