کونړ کې ډیورنډ فرضي کرښې ته څېرمه ولسوالیو کې د سرحدونو، قومونو او قبایلو چارو وزارت له خوا د ١٣١ میلیونه افغانیو په لګښت د ٣٥ پروژو چارې پیل شوې.
دانګام، شلتن، سرکاڼو، مروره، خاص کونړ او ناړۍ هغه ولسوالۍ دي چې دغه پروژې به په کې پلې شي.
د سرحدونو قومونو او قبایلو چارو وزارت معین محمد اسماعیل غزنوي وايي: « د کونړ ولایت په شپږو ولسوالیو کې ۳۵ پروژې منظورې شوې دي. نن ورځ به دا ټولې پروژې افتتاح شي. په دې ۳۵ پروژو کې د ۱۵ پروژو قراردادونه بشپړ شوي چې نن یې عملا ً پرانیستنه کوو او پاتې نورې به هم ډېرې ژر پيل کړو.»
غزنوي زیاتوي، په دې پروژو کې د روغتیا، پوهنې، بیارغونې، سړکونو، استنادي دېوالونو او پلونو جوړول شامل دي.
غزنوي څرګنده کړې: « دا ۳۵ پروژې په مختلفو برخو کې دي. په دې کې د ښوونځیو جوړول، د سړکونو جوړول، د پلونو او پلچکونو جوړول، د اوبو رسولو او استنادي دېوالونو جوړولو پروژې او دغه راز د روغتیا په برخه کې هم پروژې شته دي.»
د سیمې اوسېدونکي د دوی ستونزو ته په کتو دا پروژې کافي نه بولي او د ورته نورو پروژو د پلي کېدو غوښتنه هم کوي.
د کونړ اوسېدونکی خلیل رحمن وايي: « زموږ ډېرې ستونزې پای ته رسېدلې دي، خو د پاتې نورو د هواري هم غوښتنه کوو.»
د کونړ یو بل اوسېدونکی کرامت وايي: « باید زموږ د خلکو ستونزو ته توجه وشي، باید دې خلکو ته کلینکونه او سړکونه جوړ شي او بچیانو ته یې د ښوونې روزنې زمینه برابره شي.»
د چارواکو له مالوماتو سره سم، د اسلامي امارت مشرتابه د ډيورند فرضي کرښې په اوږدو کې پرتو سیمو د بیارغنیزو چارو د پروژو لپاره یو میلیارد افغانۍ ځانګړې کړې چې د ځنیو هغو یې کارونه عملا پیل شوي دي.
