د کابل پر رایو به دواړه ټاکنیز کمېسیونونه چنې وهي چې باطلې او یا هم معتبرې حساب شي.
ټاکنو کمېسیون بیا وایي چې شکایتونو کمېسیون ته به مالومات ورکړي چې ستونزه حل شي.
د کابل رایو په تړاو د ټاکنیزو کمېسیونونو جنجال وروستی شوی ندی او لا هم مالومه نده ده چې د کابل رایې به باطلې او که معتبرې حساب شي.
اوس چې دواړه کمېسیونونه د حکومت په منځګړیتوب په ځينو مواردو ګډ تفاهم ته رسېدلي، شکایتونو کمېسیون وايي، هغه کسان چې د دوی لخوا له دندو لرې شوي باید له دندو لرې شي، او که ټاکنو کمېسیون د کابل د رایو په تړاو سم مالومات ور نه کړي، دغه رایې هم باطلې دي.
اوس نیوکه دا ده چې دواړه کمېسیونونه خپلواک ندي او د حکومت تر تاثیر لاندې دي.
ټاکنو کمېسیون وايي، حکومت یوازې مځګړیتوب کړی او د کابل د رایو په تړاو به شکایتونو کمېسیون ته مالومات ورکړي چې دا رایې باطلې نه شي.
په ټاکنو د څار بنسټونه ټینګار کوي چې اوس دې دواړه کمېسیونونه سالمې پرېکړې ته ورسېږي چې ستونزه حل شي.
فیفا د حکومت مداخله د دواړو کمېسیونونو د نه همغږي او ضعیف مدیریت له امله بولي.
د شکایتونو کمېسیون پرېکړه ټاکنو کمېسیون ځکه نه مني چې سیاسي ده او په دومره لوړه کچه فساد پکې ندی شوی چې رایې دې باطلې شي.
بل خوا د کابل د رایو د نامالوم برخلیک له امله خلک په دواړه کمېسیونونو نیوکې کوي چې د خلکو رایو ته احترام نه لري.
