د امرباالمعروف او نهي عنالمنکر وزارت له لوري پر رسنیو ځينو محدودیتونو د رسنیو او خبریالانو ملاتړي بنسټونه اندېښمن کړي او زیاتوي،چې له دغو بندیزونو سره به یو شمېر رسنۍ وتړل شي.
د خبریالانو ټولنه وايي، که د یاد وزارت له لوري خپور شوی مکتبوب بشپړ عملي شي، لیرې نه ده،چې ګڼې فعاله تصویري رسنۍ خپل فعالیت ودروي.
د یادې ټولنې غړی حجت الله مجددي وايي:« که دغه مکتوب ټکی په ټکي عملي شي،په هېواد کې ځنې رسنۍ له لاسه ورکوو. موږ په تفریحي او اجتماعي برخو کي لېدونکي لرو او موږ د دې وړتیا نه لرو، چي سیریالونه او فلمونه جوړ کړو.»
دوی له اسلامي امارت څخه د یوې کمیټې جوړولو غوښتنه لري او په خبره یې ښه به دا وه،چې د بندیزونو له لګولو وړاندې د رسنیو استازو سره مشوري ترسره شي.
د خبریالانو ټولنې مشر حفیظ الله بارکزی وايي:«بهرني فلمونه او سیریالونه په هېواد کې دوبله کیږي او هغه څه چي د هېواد د قوانینو خلاف دي،پاک کیږي. زموږ غوښتنه داده،چي یوه کمیټه جوړه شي او کار وکړي.»
دا نوې کړنلاره د اسلامي امارت د امر بالمعروف او نهی عن المنکر وزارت له خوا چمتو شوې،چې د رسنیو او خبریالانو له استازو سره په غونډه کې دوی ته اورول شوې ده.
د دغو اصولو له مخې تلویزیونونه باید داسې ډرامې او تمثیلي پروګرامونه خپاره نه کړي،چې لوبغاړې یا تمثیلوونکي یي ښځې وي، کومیډي او تفریحي پروګرامونه دې داسې نه چمتو کېږي،چې چا ته په کې سپکاوی وشي٬ دا خپور شوي مکتوب اته مادې لري.
