د ۱۴۴۷ هجري قمري کال له پیل سره سم، د عمرې حج ادا کولو لپاره سعودي عربستان ته د افغان زیارت کوونکو د تګ پروسه پیل شوه.
د حج، ارشاد او قافو وزارت د ارشاد، حج عمرې او زیارتونو رئیس ډاډ ورکړی چې افغان زایرینو ته به په سعودي عربستان کې ښه او پر وخت خدمات وړاندې شي او هېڅ ډول ستونزو سره به مخ نه شي.
د ارشاد، حج عمرې او زیارتونو رئیس مولوي محمد نبي محمدي وايي: « موږ تاسو ته وعده در کوو او له ټول ملت سره ژمنه کوو چې موږ به په ۱۴۴۷ هجري قمري کال کې د عمرې زیارت کوونکو لپاره ښه خدمات وړاندې کړو.»
په همدې حال کې د حج او اوقافو وزارت مرستیال له ټولو هغو زیارتي شرکتونو چې د عمرې حج لپاره د افغان زیارت کوونکو د لېږد وسیله دي، غوښتنه کوي چې افغان زایرینو ته لازمې اسانتیاوې برابرې کړي.
د ارشاد، حج او اوقافو وزارت معين مولوي عزیزالرحمان منصور وايي: « له هغو شرکتونو چې د معتمرینو لپاره وسیله جوړېږي، غوښتنه مې دا ده چې عمره کوونکو ته ښه خدمات وړاندې کړي.»
د یادونې وړ ده چې تېرهجري قمري کال کې له اویا زرو زیات افغان زایرین د عمري ادا کولو لپاره سعودي عربستان ته تللي او سږکال هم اټکل کېږي چې تر اتیا زرو افغانان به د عمرې ادا کولو لپاره حرمینو شریفینو ته لاړ شي.
