د جرمني کورنیو چارو وزیر ويلي، هېواد یې هڅه کوي د افغانستان سرپرست حکومت سره مخامخ موافقه وکړي، ترڅو هغه افغان کډوال چې پر جرمونو محکوم شوي، بېرته افغانستان ته واستوي.
د جرمني کورنیو چارو وزیر الېکساندر ډوبرېنټ ویلي: « زما نظر دا دی چې موږ باید له افغانستان سره مستقیمه موافقه وکړو، ترڅو بېرته ستنولو ته لاره هواره شي. دا بهیر نه شي کېدای د تل لپاره د درېیمو هېوادونو له لارې دوام ومومي؛ ځکه دوی هڅه کوي چې دا کار مستقیم د افغانستان له سرپرست حکومت سره وکړي.»
سرپرست حکومت د جرمني دغه اقدام ستایي او ډاډ ورکوي چې په کوردننه به د ټولو افغانانو انساني کرامت خوندي وي.
د کډوالو او راستنېدونکو چارو وزارت مسوولین وایي، غوره ده چې په جرمني کې په جرمونو محکوم شوي افغانان افغانستان ته را انتقال او دوسیې یې دلته په شفاف ډول وڅېړل شي.
د کډوالو او راستنېدونکو چارو وزارت ویاند عبدالمطلب حقاني وايي: « موږ د جرمني هېواد دا اقدام مثبت ګام بولو. دا چې یو مهاجر په بل هېواد کې د جرم په تور په بې سرنوشته توګه بندي وي او یا بې سرنوشته راشړل کېږي، تردې دا غوره ده چې د افغانستان له اسلامي امارت سره په تفاهم د دوی دوسیې هېواد ته را انتقال شي او دلته په شفافه بڼه وڅېړل شي. له دې کار سره به نه یوازې د دغو مهاجرینو حقوق تأمین شي بلکې د دواړو هېوادونو ترمنځ په اړیکو کې به هم مثبت بدلون راشي. موږ ټولو افغانو ته ډاډ ورکوو چې د دوی انساني کرامت په خپل هېواد کې ښه ساتل کېدای شي او د دوی له مهارتونو به هم مثبته ګټه واخیستل شي.»
د سیاسي چارو شنونکي په دې باور دي چې جرمني هڅه کوي د خپلې پالیسۍ مطابق هغه وګړي له ډېپلوماټیکو لارو اخراج کړي چې دې هېواد کې د ناامنۍ سبب شوي، ترڅو په خپله خاوره کې د نورو جرمونو پېښېدو مخه ونیسي.
د کډوالو حقونو مدافع نظیر نظري وايي: « هر هېواد خپله ځانګړې پالیسي لري او د همدې پالیسۍ پر بنسټ پرېکړې کوي. د جرمني د دې کار او له اسلامي امارت سره د مخامخ اړیکې هدف دا دی چې د هغو ستونزو مخه ونیسي چې په دې هېواد کې له امنیتي پلوه پېښې شوې دي او هغه کسان چې دوی ته خطر لري او ستونزې زیږوي، د خبرو او ډېپلوماټیکو اړیکو له لارې بېرته افغانستان ته ستانه کړي، ترڅو د لا ډېرو جرمونو مخه ونیسي.»
د کډوالو حقونو مدافع ابولحسن صالحي وايي: « جرمني د دې مخامخ خبرو ترسره کولو له لارې غواړي هغه افغان کډوال چې په جرمني کې یې جرمونه کړي، په اصلي هېواد یا افغانستان کې یې برخلیک روښانه کړي؛ ځکه چې دا کار د درېیمو هېوادونو له لارې ډېر وخت ته اړتیا لري، خو جرمني غواړي دا کار ژر تر ژره وشي او مجرم کډوال افغانستان ته واستوي.»
دا ګامونه د جرمني محافظهکارو سیاستوالو له خوا د کډوالۍ د سخت سیاستونو یوه برخه بلل کېږي او داسې ښکاري چې په دې هېواد کې به د افغان او سوریایي کډوالو لپاره شرایط ورځ تر بلې سخت شي.
