د ریاست الوزرا اقتصادي مرستیال ملا عبدالغني برادر اخوند د اقتصادي همکاریو سازمان(ایکو) په ۱۷ مه ناسته کې چې د غړیو هېوادونو ولسمشرانو او بهرنیو چارو وزیرانو په کې ګډون درلود، د خبرو پرمهال له افغانستان سره پر رسمي اړیکو ټینګولو ټینګار کړی.
ملاعبدالغني برادر اخوند ویلي، اوس افغانستان د سیمه ییزې اقتصادي همکارۍ لپاره په یو ښه فرصت بدل شوی او د ایکو سازمان غړي هېوادونه دې په بېلا بېلو اقتصادي برخو کې افغانستان سره له نږدې کار وکړي.
برادر زیاته کړې: « د افغانستان جغرافیايي موقعیت ته په کتو، د سیمه ییز اتصاد پروژې د افغانستان اسلامي امارت په لومړیتوب کې دي. د دغو پروژو عملي کول د سیمې پر کچه د سیاسي سیالۍ په ځای د اقتصادي همکاریو د پيل کېدو ستر عوامل بولي. له همدې امله د اقتصادي همکاریو سازمان هېوادونه اوس کولی شي او غوښتنه ترې کوو چې له یوه باثباته، باوري او همکار افغانستان سره د اقتصادي او سیمه ییزو همکاریو د پياوړتیا لپاره د دوام داره پرمختګ او همغږۍ فضا جوړېدو ترڅنګ، د سوداګرۍ، پانګونې، انرژۍ، ټرانسپورټ، کرنې، چاپېریال ساتنې او اقلیمي بدونونو په برخه کې له نږدې کار وکړي.»
د سیاسي چارو کارپوهان بیا وايي، افغانستان د خپل جغرافیايي موقیعت له امله هېوادونو ته ځانګړی ارزښت لري او مرکزي او جنوبي اسیا سره وصلوي.
د دوی په وینا، د ایکو سازمان غړیو هېوادونو لپاره د ټرانزیټ او ټرانسپورټ لنډه لار هم ده.
کارپوهان دغه راز وايي، د نړۍ په اوسنیو شرایطو کې د اقتصادي همکاریو سازمان غړیو هېوادونو لپاره افغانستان هم له اقتصادي او هم له سیاسي پلوه مهم دی او هېوادونو هم دغه مساله درک کړې.
د سیاسي چارو شنونکی معین ګل څکمنی وايي: « افغانستان له جغرافیايي او اقتصادي پلوه ډېر مهم دی؛ ځکه چې هم ټرانزیټ ترې کېدای شي او هم په افغانستان کې ډېر زیات کانونه موجود دي او د اتصال رول هم لوبوي. افغانستان جنوبي آسیا او منځنۍ آسیا له اروپا سره نښلوي؛ همدارنګه موږ د ورېښمو لار هم په خپل ملکیت کې لرو چې اوس مهال کار پرې روان دی.»
د ریاست الوزرا اقتصادي مرستیال ملا عبدالغني برادر اخوند وايي، د اسلامي امارت بهرنی سیاست متوازن او اقتصادي محوره دی او دوی یې پر مټ توانېدلي چې له هېوادونو سره اړیکې پراخې کړي.
نوموړی له نړیوالې ټولنې او په ځانګړې توګه د اقتصادي همکاریو سازمان له غړیو هېوادونو وغوښتل چې له افغانستان سره سیاسي او اقتصاد تعاملاتو ته را وړاندې شي.
د ریاست الوزرا اقتصادي مرستیال په دې اړه ویلي: « د افغانستان اسلامي امارت له بېلابېلو سیمه ییزو هېوادونو سره د اړیکو پراخېدو له لارې دا ثابته کړې چې د تعامل لپاره هم اراده لري او هم ظرفیت. موږ د متقابل احترام، عملي همکارۍ او ګډو ګټو پر بنسټ اړیکو ته ژمن یو؛ له همدې امله له نړیوالې ټولنې او په ځانګړي ډول د ایکو سازمان له غړیو هېوادونوغوښتنه کوو چې له یوه واقع بینانه لیدلوري سره د افغانستان له حکومت سره سیاسي او اقتصادي تعامل زیات کړي.»
د ریاست الو زرا اقتصادي مرستیال په خپلو خبرو کې زیاته کړې، اوس مهال په افغانستان کې د پانګونې لپاره له بل هرخت ښه زمینه برابره ده او د ایکو سازمان غړي هېوادونه کولی شي په افغانستان کې د برېښنا، کانونو او نورو برخو کې پانګوونه وکړي.
