د اطلاعات او کلتور وزارت د ګرځندوی، مالي او اداري معین له اسوشيېټيډ پرېس خبري اژانس سره په مرکه کې ویلي، یوازې د روان ۲۰۲۵ زېږدیز کال په لومړیو درېیو میاشتو کې زرګونه بهرنیو سیلانیانو د افغانستان له بېلابېلو ولایتونو لیدنه کړې.
قدرتالله جمال نورو سیلانیانو ته هم افغانستان ته د راتګ بلنه ورکړې او په خبره یې، ګرځندویانو ته یې په هره برخه کې اسانتیاوې برابرې کړې.
جمال په دې اړه ویلي: « تېر کال نږدې ۹ زره بهرني سیلانیان افغانستان ته راغلي وو او د روان کال په لومړیو درېيو میاشتو کې نږدې ۳ زره نور راغلي. افغانستان کلونه جګړې او کړاوونه تېر کړي، خو اوس غواړو سیلانیان راشي. د افغانانو اصلي دودونه، ژوند، نوښت او زغم له نږدې وویني. د دوی لپاره ډېرې اسانتیاوې برابرې شوې دي. اوس په افغانستان کې بشپړ امنیت دی.»
بله خوا، افغانستان ته راغلي یو شمېر بهرني سیلانیانو هم ویلي، دا هېواد اوږد تاریخ او لرغونې او تفریحي سیمې لري او د لیدنې لپاره یې مناسبې بولي.
سیل کوونکې کاټلین ګراهما وايي: « کله چې موږ افغانستان ته راغلو، که څه هم دا جګړه ځپلی هېواد دی او په اړه یې ناسم پوهاوی شتون لري، ډېر په زړه پورې طبعیت لري. خلک یې ډېر دوستانه دي. د لیدلو وړ ډېرې سیمې لري. له بده مرغه دلته د تېرو پېښو له امله ډېر کسان نه دي راغلي. د خلکو چلن ډېر په زړه پورې و.»
یو شمېر نور بهرني سیلانیان بیا له دوی سره د خلکو او حکومتي مسوولینو له چلن خوښي ښیي او په خبره یې، دلته له هېڅ ډول امنیتي او نورو ستونزو سره نه دي مخ شوي.
سیلانۍ الووییا وايي: « زه به حتما هغه کسان چې وېرېږي، وهڅوم څو افغانستان ته راشي؛ ځکه خلک یې ډېر دوستانه او مېلمه پال دي. موږ د طالبانو له لوري هېڅ ستونزو سره نه یو مخ شوي. د تلاشۍ ډېر ځایونه وو، یوازې یې زموږ اسناد کتل او اجازه یې راکوله.»
هېواد ته د بهرنیو سیلانیانو له راتګ سربېره د اطلاعات او کلتور وزارت د معلوماتو پر بنسټ، یوازې د لوی اختر په شپو ورځو کې شاوخوا ۳۰۰زرو کورنیو سیلانیانو د بېلابېلو ولایتونو له تفریحي او تاریخي سیمو څخه لیدنه کړې.
