Skip to content
د امریکا کانګرس دوو جمهوري غوښتونکو غړو د ملګرو ملتونو سرمنشي انټونیو ګوترس ته د یوه لیک په استولو سره د یاد سازمان له خوا د اسلامي امارت د رسمیت پېژندلو په اړه جدي اندېښنه ښودلې او دا ډول اقدام یې له هغو ارزښتونو سره په ټکر کې بللی دی.
سناتور لنډیسي ګراهام او د استازومجلس غړي مایکل والټز، چې دواړه جمهوري غوښتونکي دي، په دې لیک کې ټینګار کړی دی، چې په هره بیه کېږي، د اسلامي امارت پر رسمیت پيژندلو ډډه وشي او د هغوی په وینا ، د ملګرو ملتونو چوکۍ باید داسې یوه رژیم ته ورنه کړل شي، چې غړي یې د ترهګرو په توګه ثبت دي.
د لیک یوه برخه:« افغان طالبانو د مېرمنو او نجونو حقونه تر پښو لاندې کړي، د امریکا او ناټو پخواني همکاران یې تعقیب کړي او وژلي، د بیان ازادي او مطبوعات یې ځپلي او د القاعده او حقاني شبکې په شان بهرنیو ترهګرو سازمانونو سره یې خپلې اړېکې ټینګ کړي دي.»
بل خوا د سیاسي چارو یو شمېر تحلیل کوونکي په دې باور دي، که امریکا هڅه کوي، چي د اسلامي امارت پر رسمیت پېژندل وځنډوي، دا یوازې له افغان ملت سره جفا او دښمني ده.
د ولسي جرګې پخوانی غړی شاه محمد شهاب وايي:« اسلامي امارت راغلی دی، کومې ژمنې یې چې له دوی ( امریکا) سره کړي، د هغې پر اساس راغلي. امریکا پر خپلو ژمنو ونه درېدله. موخه یې دا وه، چې په افغانستان کې یو تل پاتی ناورین روان وي او په ځانګړي ډول بشري ناورین، د فقر ناورین، افغانان له اقتصادي ستونزو سره دوی مخ کړي. له همدې امله دوی له موږ سره خپله دوښمني دایمي ساتلې ده.»
د افغانستان اسلامي امارت د ویاند مرستیال بلال کریمي بیا وايي، د امریکا جمهوري غوښتونکو، چي کوم نظر ورکړی دی، دا یوازي افراد او اشخاص دي او د امریکا په عمومي پالیسۍ کومه اغېزه نه لري.
کریمي زیاتوي:« د اشخاصو او افرادو اندونه دي، چې د امریکا متحده ایالتو پر عمومي پالیسي منفي اغېز نه لري. په تېرو ۲۰ کالونو کې هم داسې اشخاصو یا جنګ طلبو جنرالانو او ځنې افرادو هڅې وي، چې پایله یې دا شوه، چې د امریکا ښکېلتیا په افغانستان کې دومره اوږده شي، چې نږدې ۲۰ کالونو ته ورسېده.»
د طالبانو د سرپرستې کابینې د رئیس الوزرا ملا محمد حسن اخند په ګډون د طالبانو د رهبري یو شمیر غړي د ملګرو ملتونو د بندیزونو په نوملړ کې دي.
د افغانستان د مخکیني حکومت له پاشل کېدو او پر افغانستان د اسلامي امارت له واکمن کېدو وروسته ملګرو ملتونو تل په افغانستان کې د بشري ناورین د رامنځ ته کېدو خبرداری ورکړی او دې مسلې ته یې د نړیوالې ټولنې د جدي پاملرنې غوښتنه کړې ده.
