په داسې حال کې چې له پاکستان او يرانه د افغان کډوالو د اخراج لړۍ دوام لري، تازه د بښنې نړيوال سازمان ويلي، دغه لړۍ به په ځانګړې توګه له پاکستانه د افغانانو د اخراج له بلې څپې سره لا چټکه شي.
یاد سازمان د يوه راپور په خپرولو سره ويلي، په پاکستان کې د مېشتو هغو افغان کډوالو د اوسېدنې قانوني موده د روانې جون مياشتې تر وروستۍ نېټې پای ته رسېږي چې د کډوالو په توګه د راجسټر کارټونه(پي.او.آر) ورسره دي.
د بښنې نړيوال سازمان غوښتنه کړې چې پاکستاني چارواکي دې له زغم کار واخلي او د کډوالو پر وړاندې دې له ناوړه چلن ډډه وکړي.
د راپور یوه برخه:« په وروستي پړاو کې هغه کسان په نښه کېږي چې د پي.او.آر کارتونه ولري. دا هغه کارتونه دي چې د ملګرو ملتونو د کډوالۍ ادارې له خوا صادر شوي دي. دا ټول لږ تر لږه ۱.۴ میلیونه کسان دي چې د جون پر۳۰ مه نېټه یې د کارتونو وخت پای ته رسېږي.»
د بښنې نړیوال سازمان له پاکستان غوښتي چې کډوالو ته دې وخت ورکړي او په تدریجي ډول دې يې افغانستان ته واستوي.
هڅه مو وکړه په دی اړه له پاکستان سره د شویو بحثونو په اړه د سرپرست حکومت د مسوولینو نظر هم واخلو، خو زموږ اړیکې يي ځواب نه کړې.
بله خوا د سیاسي چارو شنونکي پاکستان تورنوي چې له یوې خوا له نړیوالو د کډوالو په خاطر میلیاردونه ډالر بودیجه اخلي او له بلې خوا کډوالو سره ناوړه چلن کوي.
دوی وايي، پاکستان نه یوازې د کډوالو برخه کې بلکې په ډېرو نورو مسایلو کې هم له افغانستان سره دوه مخی چلن کوي.
د سیاسي چارو شنونکی اسماعیل ځدراڼ وايي: « پاکستان نړیوال قوانین تر پښو لاندې کړي، که دا د مهاجرینو کمېټې دي، که د څار کمېټې دي، که د بشري حقونو کمېټې ټول یې تر پښو لاندې کړي او هغوی هم په دې اړه هېڅ اکشن نه اخلي، باید اکشن واخلي او مهاجرین په داسې وخت کې راولېږي چې دلته ستونزې نه وي او د مهاجرینو لپاره چې کوم قوانین دي، د هغو قوانینو په چوکاټ کې قانوني چلن ورسره وکړي.»
ځينې نور بیا وايي، سرپرست حکومت دې د پاکستان پر وړاندې قاطع دریځ ونیسي او د افغان کډوالو ستونزه دې د تل لپاره حل کړي.
د سیاسي چارو شنونکی توریالی ځاځی وايي: « نو د دې لپاره اسلامي امارت باید هڅې وکړي، زه پوهېږي چې د افغانستان اقتصادي وضعیت ډېر خراب دی، خو باید دغو مهاجرینو ته په افغانستان کې د اوسېدلو زمینه برابره شي، ترڅو موږ د ولس، هېواد، ماشوم او مېرمنې او نرانو عزت بېرته لکه نیمه پیړۍ وړاندې خوندي شي.»
د نورو هېوادونو پرتله پاکستان او ایران تر ټولو زیاتو افغان کډوالو کوربه هېوادونه دي او وخت ناوخت د افغانستان او دغو دوو ګاونډیو هېوادونو ترمنځ سیاسي کړکېچونه د دوی د ستونزو د زیاتېدو لامل شوي دي.
که څه هم په ګاونډیو هېوادونو او سیمه کې د افغان کډوالو د ستونزو حل په اړه په ځلونو ټینګار شوی، خو تر اوسه په دې برخه کې د پام وړ پرمختګ نه دی شوی.
