د امريکا استازو جرګې په يوه تازه اقدام کې هغې لايحې ته مثبته رايه ورکړه چې د افغانستان سرپرست حکومت لاس ته د امريکايي ماليه ورکوونکو په پيسو د چمتو شویو مرستو لوېدو مخنيوی کوي.
دغه لايحه د يادې جرګې د بهرنيو اړيکو کمېټې له لوري د هغو ادعاوو پر بنسټ وړانديز شوې وه چې موده وړاندې د افغانستان پر بيا رغونې د امريکا د څار ادارې(سيګار) له لوري شوې وې.
دغې ادارې د تېر کال په مې مياشت کې ادعا وکړه چې د امريکا له لوري د افغانستان سرپرست حکومت ته ۱۰ ميليونه ډالر د مالياتو له پيسو ورکړل شوې دي.
اوس د استازو جرګې د بهرنيو اړيکو کمېټه ډاډ ورکوي چې د يادې لايحې په تصويب سره د افغانستان سرپرست حکومت ته د امريکا د ورته پيسو د ورکړې مخه ونيول شي.
د امریکا استازو جرګې د بهرنیو اړيکو کمېټې ریيس براین ماسټ وايي: « دا لايحه یقیني کوي چې د امریکایي مالیه ورکوونکو یو سېنټ هم د طالبانو لاسونو ته نه لوېږي. نه په مستقیم ډول او نه هم د غیر دولتي سازمانونو له لارې. که تاسو طالبان تمویل کړئ، نو د متحده ایالاتو ملګري نه یاست.»
د روان میلادي کال په پیل کې د کانګرېس جمهوري غوښتونکو غړیو د ټېم بورچيټ پر مشرۍ کاري ډلې ته د دې لايحې چمتو کولو لار هواره کړه، هغه چې ګڼو ډيموکراټ غړيو يې له تصويبولو انکار وکړ.
د کانګرېس جمهوري غوښتونکو غړیو د استازو جرګې د بهرنیو چارو کمېټې دغه لايحه او تصويب ستايلی دی.
د امريکا استازو جرګې د بهرنيو اړيکو کمېټې غړی ټېم بورچيټ وايي: « غواړم له ریيس ماسټ او د جرګې بهرنیو چارو کمېټې له ټولو غړیو مننه وکړم چې په دې قانوني لايحه یې جدي کار کړی. موږ اوس یو ګام نږدې یوو، ترڅو ډاډ ترلاسه کړو چې امریکایي ډالر ترهګريزو سازمانونو ته نه ځي.»
په دې په تړاو مو له حکومتي مسوولینو سره اړيکه وکړه، خو د راپور تر خپرېدو یې خپل نظر له موږ سره شریک نه کړ.
د اقتصادي چارو شنونکي وایي، په نړیوالو مرستو کې کموالی د افغانستان پر اقتصاد اغېزه لري، خو له بلې خوا دا یو ښه فرصت بولي چې افغانستان د کرنې، کانونو او نورو سکټورونو کې پانګونه وشي.
د اقتصادي چارو شنونکی نورالله عزیز وايي: « که له یوې خوا دا د افغانستان پر اقتصاد منفي اغېز لري، له بلې خوا کولی شي د افغانستان لپاره یو فرصت شي؛ ځکه افغانستان به وکولی شي له خپلو شته امکاناتو اعظمي ګټه واخلي، د کرنې او صنعت پر سکټورونو به کار وکړي او پانګونه به جذب کړي. دغه راز د کانونو او خدماتو سکټور په برخه کې د نویو پروژو پيل کول هغه څه دي چې د افغانستان په اقتصاد کې فوق العاده اغېز لرلی شي»
د حقوقي چارو شنونکی اسماعیل ځدراڼ وايي: « د امریکا یا نورو هېوادونو له خوا د مرستو بندول به زما په خیال ظلم وي؛ ځکه چې افغانستان اوس مهال دغو مرستو ته اړتیا لري او د افغانستان ولس بېوزله دي او د دوی لپاره باید نه یوازې مرستې کمې نه شي بلکې لا ډېر شي.»
د امریکا د بهرنیو چارو وزارت د مجلس کمېټې او د کانګرېس جمهوري غوښتونکو له لوري له سرپرست حکومت سره په بشپړ ډول د امریکا د بشري مرستو د بندولو د دغه وړاندیز مسوده د وروستي تصویب لپاره اوس د سنا مجلس ته وړاندې کېږي.
