د ننګرهار ولایت ښاروالۍ مسولین وايي ښار کې د شته ګڼې ګوڼې او بې نظمۍ د کمښت په موخه یې د ښار په تشکیل کې دوه نورې ناحیې ورزیاتې کړې.
دوی زیاتوي، پخوا جلال اباد ښار کې ۹ ناحیې وې خو اوس په کې لسمه او یولسمه ناحیه هم ورزیاته شوه.
د جلال اباد ښاروالۍ ویاند حامد محمودي وايي:« تر دې مخکې جلال اباد ښار ۹ ناحیې درلودلې او تر دې وروسته به ۱۱ ناحیې وي، دغو ناحیو کې ۱۰ مه ناحیه د شیخ مصري په سیمه کې قرار لري او ورسره به څنګ کې ۱۱ مه ناحیې لپاره ۹ مې ناحیې ځینې حدودات ورته جدا کیږي او ۱۱ مه ناحیه او دا د ۱۱ مې ناحیې حدوداتو کې ټاکل شوې.»
جلال اباد ښاریان په ښار کې اوسنۍ ګڼې ګوڼې او بې نظمۍ ته په کتو د مسوولینو د دغه اقدام هرکلی کوي او د یادو ناحیو د چارو د ژر پيل غوښتنه کوي.
د جلال اباد ښار یو تن اوسېدونکی حیدري وايي:« ناحیه د ښار په ښکلا او تاسس کې ډېر رول لري او موږ د دغو ناحیو د تاسیس په تړاو ځینې غوښتنې لرو او هغه دا چې د دغې لپاره یو منظم تشکل جوړ شي. موږ تر اوسه پورې ۹ ناحیې لرو چې اکثره ناحیو کې د تشکیل کمښت شته په ځانګړي ډول د تنظیفاتو برخه کې، نو دې برخه کې کمښت شته او نویو تاسیس شویو ناحیو کې یو اساسي تشکیل جوړ کړي.»
د جلال اباد ښار یو بل اوسېدونکی پرویز وايي:« فوکس په ښار کې ده او ښار ډېر وړوکی دی، ښار د یو میلیون خلکو لپاره جوړ شوی ان د ظاهر شاه په وخت کې، اوس یوازې په دویمه ناحیه کې یو میلیون خلک تګ راتګ کوي نو ګڼه ګوڼه زیاته ده که بازار پراخه شي نو موږ لپاره ښه دی.»
په همدې حال کې د ښاروالۍ مسوولین د ښاري نظم ډاډ ورکوي او زیاتوي چې د ښاري نظم ساتنې لپاره يې د څارنې ټیمونه ګومارلي.
د جلال اباد ښاروالۍ ویاند حامد محمودي وايي:« ځینې پلې لارې چې پخوا خلکو بندې کړې وې هغه اوس خلاصې شوي او څنګ کې د زرګرانو کوڅه چې دلته ۷۵۰ غرفې ایښودل شوې وې د ریاست الوزرا د حکم پر اساس دغه غرفې پورته شوي دي. په راتلونکي کې د جلال اباد ښاروالۍ پلان لري هغه غرفې چې بېځایه اېښودل شوي هغه پورته کړي ترڅو ښاریان په ښار کې په اسانۍ سره تګ راتګ وکړي.»
جلال اباد ښار کې دا دوه ناحیې داسې مهال زیاتېږي چې په تېرو ۹ ناحیو کې ځینې يې د دې ولایت مرکزي ولسوالیو ته غځېدلې د سیمو اوسېدونکي په کې ترسره کیدونکي خدمات پوره نه بولي او تمه ښيي چې د دې نویو ناحیو په زیاتیدو سره به د نورو هغو امکانات هم ډېر شي.
