په کابل کې نن پنجشبنه د« ۱۴۰۰ کال د لړم پر ۲۷ مه» د هېواد پر کچه د اهل تشیع مذهب مشران سره راټول شوي، چې څنګه کولای شي، له اسلامي امارت سره په همکارۍ او همغږۍ د دوی پر وړاندې د شته امنیتي ستونزو مخه ونیسي.
دغه شیعه مشران وايي، په امنیتي او حقوقي برخو کې د اسلامي امارت رهبرۍ ورسره د همکارۍ ژمنه کړې او دوی به هم ترې خپله همکاري ونه سپموي.
د شیعه مذهبو یو تن قومي مشر محمد امیر باذل وايي:« زموږ باور دا دی، چې امنیت به ټنیګ شي او بله ستونزه حقوقي او مدني مسایل دي، چې اسلامي امارت او زموږ خلک هم هڅه کوي، چې دغه ستونزه حل شي او په دې برخه کې موږ له اسلامي امارت سره د همکارۍ اعلان کړی دی، چې د ټولو شته منازعاتو په حل کې به مرسته کوو.»
دغه مشران وايي، د رواني امنیت د ټینګښت په برخه کې زیات کار ته اړتیا ده او په خبره یې د دغوستونزو د حل لپاره یې له اسلامي امارت سره د همکارۍ ژمنه کړې.
دشیعه مذهبو یو تن قومي مشر بحر وايي:« که څه هم په دې وروستیو کې امنیت ښه شوی دی، خو د رواني امنیت په برخه کې زیات کار ته اړتیا ده او شیعه او هزاره ولسونو مصمم دي، چې په دې برخه کې له اسلامي امارت سره مرسته وکړي او د دغو ستونزو د حل لپاره اسلامي امارت ژمنې کړي.»
د افغانستان اسلامي امارت بیا ډاډ ورکوي، چې په دې تړاو یې رهبرۍ پریکړه کړې، چې په راتلونکي کې به د شیعه مذهبو د ستونزو د حل لپاره د هېواد پر کچه داسې کمېسیون جوړ کړي، چې غړي به یې هم خپله دوی وي.
د اسلامي امارت د استخباراتو عمومي ریاست د منازعاتو حل کمېسیون غړی نور اغا سهاک وايي:« اسلامي امارت او مجاهدین یې په خپلو ژمنو ولاړ خلک دي او دوی ته د هرډول اسانتیاوو زمینه برابروي او برابره کړې یې ده. که حقوقي ده او اسلامي امارت رهبري په پام کې لري، چې د دغو ستونزو د حل لپاره د اهل تشیع لپاره د هېواد پر کچه یوه کمیټه جوړه کړي، چې غړي به یې هم شیعه مشران وي او د یادو ستونزو د حل په برخه کې به کار کوي.»
دمګړۍ افغان شیعه لږکي افغانستان کې د داعش ډلې هدف دي، چې د چهارشنبې پر ماښام د کابل په لویدیځه برخه کې پر دوه ټونس موټرونو نښلول شویو بمونو چاودنه کړې، چې سپاره په کې ټول شیعه لږکي و او مرګ ژوبله یې هم درلوده.
