Skip to content
په کندهار ولایت کې د تنخواوو د نه ورکړې له امله له تېرې اوونۍ راهېسي ښوونکو کاري اعتصاب پيل کړی دی، چې له امله یې د زرګونه زده کوونکو زده کړې ټکنۍ شوي دي.
د کندهار د ښوونکو د ټولني غړی عبدالمالک عزیزي وایي، د تنخواوو د نه ورکړي له امله د ښوونکو کاری اعتصاب لاهم دوام لري او که د ښوونکو تنخوا نوره هم وځندېږي، نو زيات ښوونکي به اړ شي، چې خپلی دندي پرېږدي.
عزيزي زیاته کړه:«که تنخواوې رانه کړل شي، زموږ اعتصاب به دوام کوي او له اعتصاب اخوا هم زموږ ستونزه حل نه شي، موږ به د ځان لپاره نورې دندې ولټوو.»
اخوا زده کوونکي بیا وایي، ښوونکي يې حاضري نه اخلي او درس هم نه ورته وایي او په وینا یې دې چاری دوی له نامالوم برخليک سره مخ کړي.
زده کوونکي د اسلامي امارت له چارواکو د ښوونکو د تنخواو د ورکړي غوښتنه کوي.
یو تن زده کوونکی حیات الله وايي:«زموږ غوښتنه دا ده، چې ښووونکو ته دې تنخواوې ورکړل شي، تر څو زموږ درسونه بېرته پیل شي. که ښوونکی تنخوا ونه لري، مانا دا چې موږ درس نه لرو.»
بل پلو د کندهار پوهني ریاست مشر مفتي قدرت الله وصال وایی، د ښوونکو د تنخواوو د ورکړي ستونزه هوارېدونکې ده.
وصال وایي، له ښوونکو سره يې پر ګډه د ستونزي د هواري هڅه پېل کړې او په خبره یې ځنې ښوونکو ته د اسد میاشتې د تنخوا ورکولو لړۍ پیل کړې ده.
هغه زیاته کړه:« ډېر ژر به ټولو ښوونکو ته د ټولو میاشتو تنخوا ورکړل شي، همدا اوس موږ ښوونکو ته د اسد میاشتې تنخوا ورکولو لړۍ پیل کړې ده.»
ښوونکو کندهار کې له تېرو څلورو مياشتو راهيسي تنخواوې نه دي اخېستي، چې له امله یې له ستونزو سره مخ دي، ان تر دې، چې ځينو يې خپلې دندي پريښي دي.
مسوولين د يادي ستونزي اصلي لامل بانکي محدوديتونه په ګوته کوي.
