محمد رضا له تېرو ۲۵ کلونو راهیسې دلته د کندهار لومړۍ ناحیې اړوند د ټک ټک بازار سيمه کې حلبي سازې کوي او له څو کلونو راهیسي وطني کولران هم جوړوي.
دی وايي، دې موسم کې دلته همدا کولر پکي ډېر پلورل کېږي او بیه يې هم تر بهرنیو هغو مناسبه ده.
هغه په دې اړه وايي:« د کولرانو بازار ښه دی بیخي سم را روان دی ښه ګرمي ده، ډېر خرڅیږي، نو بازار يې ښه دی. کولر له ۱۰۰۰ تر ۷ زره، ۸ زره، ۱۰زره، ۱۵ زره، رقم په رقم کولران دي.»
کندهار کې توليدیدونکي کولر پکي د کندهار ښار او ولسوالیو ترڅنګ، زابل، اروزګان، هلمند او فراه ولایتونو ته هم لېږل کیږي.
د کولرتوليدونکي وایي، د دوی له لوري جوړ شوي کولر کم مصرفه او دوامداره کار کوي.
کولر جوړونکی محمد آغا وايي:« ټول دلته جوړیږي، مکمله دا وګوره موږ ښایسته په ډیزاین کې جوړ کړی، امریکايي جالونه راځي دا بیا موږ صفا کوو، رنګوو يي. بیا په دې کې موږ دوه درې قسمه خاشي لرو وطني خاشي شته، هراتي خاشي شته او ایراني خاشي هم په کې شته دي.»
پېریدونکي دغه کولر پکي تر بهرنیو هغو اقتصادي او د برښنا په نشت کې ګټور بولي چې په خبره يې د سولر په مرسته ترې ګټه اخلي.
د کندهار اوسېدونکی شفیع الله وايي:« دا خو ښه کولر دی افغانی، زموږ د افغانستان خپل تولید دی. له خاریجي دا ډېر ښه کار کوي د خلکو وس ورته رسیږي. که برق نه وي له بیټرۍ هم کار اخیستلی شي.»
د کندهار یو بل اوسېدونکی جاوید احمد بیا وايي:« افغاني کولران خو داسې دي، چې یو زموږ د خپل وطن تولید دی او بل په وطن کې یو د کار زمینه يې برابره ده.»
کندهار کې مخکې کلونه لاسي وطني کولرونه ډېر کوچني او ډولونه يې نه درلودل خو اوس د وخت په تېرېدو سره يي جوړونکو ډول ډول نوښتونه په کې کړې او ډېر لوی کولرونه هم جوړېږي.
