Skip to content
که څه هم وړمه ورځ د افغانستان بانک د افغانیو ارزښت لوړېدو په موخه لس میلیونه ډالر لیلام کړل، خو د ډالرو پر بیه یې اغیز نه دی کړی.
صرافان وايي، د افغانستان بانګ لس میلیونه ډالر نه شي کولی، د افغانیو ارزښت وساتي او اړتیا ده، چې هره اوونۍ بازار ته ډالر وړاندې کړي.
یو تن صراف وايي:« یو ځل چې بیه یې پورته ولاړه شي، هغه بیا هماغه شان پاتې کېږي.»
یو بل صراف بیا وايي:« د دې امکان شته دی، چې ښايي یو ډالر تر۹۸ یا ۱۰۰ افغانیو پورې ورسېږي. خو که هره اوونۍ د ډالر توضیع شروع کړي او ډالر لیلام کړي، بیا د امکان شته دی،چې ډالر کنټرول کړي.»
اخوا په بازارونو کې د امریکايي ډالرو لوړېدل ډېری سوداګر هم اندېښمن کړي او له اسلامي امارته غواړي، چې په دې برخه کې کوټلي ګامونه پورته کړي.
سوداګر حاجي محمد فرید وايي:« زموږ او تاسو توکي له قزاقستانه پر ډالرو راځي. زموږ پانګه ان ډالر ده. نو ډالر چې قزاقستان ته حواله کړو، له قزاقستانه توکي حیرتان بندر ته راشي، له حیرتان بندره مزار شریف ښار ته راځي. هلته چې کله پرچون پلورونکي د کابل په شمول د ۳۴ ولایتونو دا توکي خامخا پر ډالرو اخلي. هماغه باید موږ پر ډالرو خرڅ کړو.»
بل پلو دې وضعیت ښاریان هم اندېښمن کړي او نه شي کولائ، د خپلې کورنۍ لپاره خوراکي توکې راونیسي.
ښاریان وايي، هره ورځ د خوراکي توکو په بیو کې لوړوالی راځي او نیوکه کوي، چې اړونده ادارې په بازارونو کنترول نه لري.
د کابل ښار یو تن اوسېدونکی وايي:« بیې زموږ په لاس کې دي. زموږ چې څه وس کېږي، خپله پر یوه او بل ظلم کوو. د یوې افغانۍ شی پر دوو پلورو. موږ کې د ایمان ضعف شته دی، څومره مو چې وس کېږي، هغومره یې پر لوړه بیه پلورو. موږ ټول باید پر دې اعتراف وکړو. شخصي ګټه موږ ته له ټولو مهمه ده.»
د کابل په شهزاده سرای کې د چهار شنبې پر ورځ یو امریکايي ډالر شاوخوا ۹۳ افغانۍ تبادله کېده او داسې تمه نه کېږي، چې ډالر دې نور ښکته شي.
