خوست ولایت تچې د هېواد د نورو ولایتونو پرتله په کې د شخصي دوښمنیو کچه لاهم لوړه ده، ځایي چارواکي یې تڼیو ولسوالۍ کې د یوې داسې دوښمنۍ د روغې جوړې مراسمو ته چې د دوو کورنیو درې کسان په کې وژل شوي وایي، دا ولسوالي د ټول ولایت پر کچه د شخصي دوښمنیو لوړ ارقام لري او په کې ۳۲۳ دوښمنۍ له سرپرست حکومت سره ثبت دي.
د خوست سرحدونو، قومونو او قبایلو چارو ریس محمد ولي صدیقي وايي: « په دې قوم کې دا ماشومان چې بې تعلیمه دي، مکتب ته نه شي تللی، مدرسې ته نه شي تللی، کور په کور ټوپک ګرځوي، دا به تر کومې ادامه ولري؟»
قومي مشر سید کریم خاکسار وايي: « دا نن ورځ چې کومه بدي خلاصه شوه، د دوو کورنیو ترمنځ و چې یویې له درانیو کورنۍ سره تعلق درلود او بل له ښادي خېلو قوم سره. شاوخوا ۲۰ کاله کېږي چې دا بدي روانه وه او تر اوسه ۳ کسان په کې وژل شوي، خو له نېکه مرغه څلورم کس وبښل شو.»
د قومي مشرانو او ښکېلو کورنیو په خبره، شخصي دوښمنۍ لاهم د خوست او په تېره بیا تڼیو ولسوالۍ پر کچه یوه تر ټولو جدي ستونزه ده چې د خلکو د پرمختګ او سوله ییز ژوند پر وړاندې جدي ننګونه بلل کېږي.
دوی له سرپرست حکومت او خلکو غواړي چې په یاده برخه کې هر راز ولسي هڅو ته ارزښت ورکړي، ترڅو شته ستونزې په دوستۍ بدلې شي او د نویو دوښمنیو له پېښېدو مخنیوی وشي.
قومي مشر غازي نواز تڼی وايي: « په ټولو مشرانو او د حکومت په استازو غږ کوم چې هڅه وکړي په لویه پکتیا کې قومي او کلیوالي شخړې هوارې کړي او د راتلونکو بدیو مخه ونیسي.»
د تڼیو ولسوالۍ اوسېدونکی تلاوت لیوال وايي: «بدۍ خو ډېر زیانونه لري، تعلیم نه وي، مشکلات زیات وي، څوک له کوره نه شي وتلی. هره بدي د شاتګ او ورسته پاتې توب سبب کېږي.»
د صلح کوونکې کورنۍ غړی حاجي لونګ وايي: « زه نن دومره خوښ یم، که ټوله نړۍ هم چا راکړې وای، دومره به خوښ نه وم. زه فکر کوم نن ټوله نړۍ زما خپله ده.»
خوست کې د قومونو او کورنیو ترمنځ د شخصي دوښمنیو اوږده بدبختي لاهم د یادې سیمې لپاره یو لوی سر خوږی بلل کیږي او له امله یې سلګونه کورنۍ په سختو مشکلاتو کې ښکېل دي.
د چارواکو د مالوماتو پر بنسټ، په دې ولایت کې د قومي ستونزو ترڅنګ، د کورنیو ترمنځ د شخړو او دوښمنیو نږدې زر قضیې ثبت شوې دي.
