په دې وروستيو څو مياشتو کې د روسیې او اسلامي امارت تر منځ سیاسي او اقتصادي اړیکې د پام وړ ښې شوې دي.
تازه د روسیي د بهرنیو چارو وزارت مسوولينو ویلي، د مسکو لپاره د اسلامي امارت د نوي سفیر د ورتللو په تمه دي.
د ياد هېواد بهرنیو چارو وزارت ویاندې ماریا زاخارووا له سپوتنیک خبري آژانس سره په خبرو کې ويلي، مسکو اوس مهال يوازې د ډېپلوماټيکې کچې لوړولو په اړه تصيميم نيسي خو د رسميت پېژندنې په اړه پريکړه به د دې هېواد د مشرتابه له لورې په مناسب وخت کې وشي.
زاخارووا په دې اړه ویلي: « موږ اوس مهال د اسلامي امارت د سفیر د راتګ په تمه یو، د اوسني افغان حکومت د رسميت پېژندنې پریکړه به مشرتابه کوي. موږ باور لرو چي هغه به یاده پریکړه په خپل وخت سره وکړي.»
په ورته مهال، د سیاسي چارو شنونکي وايي، د کابل او مسکو ترمنځ د اړېکو پرمختګ له سياسي او اقتصادي انزوا د سرپرست حکومت وتلو لپاره مهم دی.
د دوی په باور، روسيه د نړۍ او سيمې پر کچه له زبرځواکو هېوادونو ده او تعامل يې پر نړيواله کچه د اسلامي امارت باور لا زياتولی شي.
د سیاسي چارو شنونکی فیض محمد ځلاند وايي: « دا یو ښه پرمختګ دی، دا به نه یوازې د سیاسي باور جوړونې په برخه کې له سرپرست حکومت او روسیې سره مرسته وکړي بلکې په لویه کې به په سیمه کې د سیاسي، ټولنیزو او اقتصادي هلو ځلو لپاره هم لاره هواره کړي.»
ځینې نور بیا سيمه کې وروستيو امنيتي شخړو ته په پام ټېنګار کوي چې د افغانستان سرپرست حکومت دې له سيمه ییزو هېوادونو سره د ډېپلوماټيکو اړېکو په ټېنګښت کې محتاطانه عمل وکړي.
د سیاسي چارو شنونکې شهسوار سنګروال وايي: « له دې ټولو خبرو سره بیا هم یو سیاسي احتیاط ضرور دی. په دې مانا چې جهان وېشلی دی او د اسلامي امارت لپاره به غوره خبره دا وي چې خپله بې طرفي وساتي.»
د سیاسي چارو شنونکی توریالی ځاځی وايي: « دلته ټول د خپلو سیاسي ګټو لپاره هڅې کوي، نه د نورو هېوادونو د آرامۍ او سولې لپاره. دوی ټول ښه پوهېږي چې افغانستان ته سوله او آرامي راغلې، دا چې سفیر غواړي، ولې افغانستان په رسمیت نه پېژني؟»
روسيه داسې مهال د مسکو لپاره د اسلامي امارت د سفیر ورتګ ته شېبې شماري چې له دې وړاندې دغه هېواد په يوه اقدام کې د اسلامي امارت نوم د ممنوعه ډلو له نوملړه لرې کړ.
هغه مهال اسلامي امارت د مسکو دغه اقدام د دواړو هېوادونو ترمنځ د تعامل په برخه کې پرمختګ ياد کړ.
