د جون ۲۰ مه؛ د کډوالو له نړیوالې ورځې سره سمون لري.
افغانستان کې د اروپایي ټولنې استازولۍ د کډوالو نړیوالې ورځې په مناسبت ویلي، د ایران او پاکستان په ګډون د سیمې په هېوادونو کې د افغان کډوالو ملاتړ ته دوام ورکوي.
دغې ټولنې پر خپله اېکس پاڼه لیکلي، د ملګرو ملتونو د کډوالو سترې کمېشنرۍ سره په ګډه د خلکو د زغم، ثبات او هیلو پیاوړتیا په موخه د ښځو پر مشرۍ د معیشتي چارو ملاتړ کوي.
په افغانستان کې د اروپايي ټولنې څانګې ویلي: « افغانستان کې د اروپایي ټولنې استازولۍ د کډوالو نړيوالې ورځې په مناسبت بې ځایه شویو افغانانو ملاتړ ته دوام ورکوي او په ټول افغانستان او سیمې له ډلې ایران، پاکستان او منځنۍ آسیا کې د کډوالۍ له نړیوال سازمان سره د ۴۷ میلیونه یورو همکارۍ له لارې افغان کډوالو او په ځانګړې توګه له ښځو او زیانمنونکو سره د روغتیا، زده کړو او د ژوند د نورو لومړنیو اړتیاو برابرولو په برخه کې مرستې کوي.»
په ورته وخت کې، د ملګرو ملتونو د کډوالو ستره کمېشنري وايي، د بشري مرستو په بندیدو سره دا اداره نه شي کولی د افغان کډوالو لپاره اسانتیاوې برابرې کړي.
دې سازمان پر نړیوالو مرستندویانو غږ کړی چې د افغان کډوالو لپاره مرستې برابرې کړي.
د ملګرو ملتونو د کډوالو چارو کمېشنر سوفي جمبازیشولي ویلي: « د بشري مرستو د بندښت له امله، موږ نه شو کولی په افغانستان کې د مرستو په برخه کې خپله ونډه وساتو. د بې ځایه شویو خلکو لوی شمیر به په افغانستان کې وضعیت نور هم خراب کړي او په میلیونونو خلک به له ګواښ سره مخ کړي. له همدې امله، د کډوالۍ نړیوالې ورځې په مناسبت، له نړۍ غواړم چې اړمن افغانان هېر نه کړي.»
په ورته مهال، د خوړو نړیوال پروګرام وايي، سږکال له ۲۰۰ زرو زیات راستنېدونکي کډوال بېړنیو خوړو ته اړتیا لري.
دغه پروګرام زیاتوي، افغان راستنېدونکو سره د مرستو د دوام لپاره له ۲۰ میلیونو زیاتو ډالرو ته اړتیا ده
په افغانستان کې د خوړو نړیوال سازمان ویلي: « سږ کال له نیم میلیون ډېر افغانان له پاکستان او ایران راستانه شوي. د خوړو نړیوال پروګرام نږدې ۲۲۰ زرو راستنېدونکو ته د خوړو بېړنۍ مرسته چمتو کړې ده. خو موږ په بېړني ډول ۲۵ میلیونو ډالرو ته اړتیا لرو، ترڅو د دوی د ژوند بیا رغولو کې مرسته وکړو.»(
په همدې حال کې د افغانستان لپاره د ملګرو ملتونو ځانګړي وجهي صندوق، د دې ورځې په مناسبت له ګاونډیو او د سیمو له هېوادونو د افغانانو د باعزته او خوندي راستنېدلو ټینګار کړی.
د افغانستان لپاره د ملګروملتونو ځانګړي وجهي صندوق ویلي: « د ۳۵ کلونو بې ځایه کېدو وروسته، ډېری افغانان لاهم په جلاوطنۍ کې دي. د افغانستان وجهي صندوق له نورو شریکانو سره کار کوي، ترڅو ډاډ ترلاسه کړي چې افغان کډوال په خوندي او باعزته ډول راستانه شي.»
د ملګرو ملتونو د پراختیایي پروګرام په ګډون یو شمیر نورو نړیوالو سازمانونو هم د دې ورځې په مناسبت د افغان کډوالو لپاره د مرستې او بسپنې غوښتنه کړې.
بله خوا، د سیاسي چارو کارپوهان په کوردننه د کډوالۍ د عواملو څېړولو او د بې ځايه کېدو مخنيوي لپاره د اړينو اقدماتو پر ترسره کولو ټینګار کوي.
د سیاسي چارو شنونکی سمیر انګار وايي: « د مهاجرت عمده لاملونه نا امني، فقر، بې کاري، سیاسي بې ثباتي او د تعلیم نه شتوالی دی. خلک د امن، کار کولو او ښې راتلونکي لپاره مهاجرت کوي. دغه کار په یوه هېواد کې د کادرونو او پانګې وتلو ته لاره هواره وي.»
هڅه مو وکړه د همدې ورځې په مناسبت د کډوالو او راستنېدونکو چارو وزارت نظر هم له ځان سره ولرو، خو نظر یې راسره شريک نه کړ.
د کډوالۍ نړیواله ورځ داسې مهال نمانځل کېږي چې څه باندې ۷میلیونه افغانان په بهرنيو هېوادونو کې کډوال دي چې ډېری برخه یې ایران او پاکستان کې دي.
