هرات ښار کې د کوڅه ډبو سپیو ډېروالي د ښاریانو اندیښنې ډېرې کړي.
دوی وايي، د یادو سپیو د ډېروالي له امله يې کارونه نامنظم دي او دغه راز له داړلو یې هم ویره لري.
د هرات ښار یو تن اوسېدونکی محمد ارمان وايي:« کوڅه ګښته سپي سهار وختي او ماښام زیات وي او سهار کله چې غریب خلک کار ته ځي هغوی باندي حمله کوي. زه خپله کله چې لیله کې وم او د شپې لخوا به فوتبال لوبې ته تلم، لاره کې به یې ستونزي راته جوړي کړي وې.»
د هرات ښار یو بل اوسېدونکی حسین وايي:« د خلکو لپاره مزاحمت کیږي او ډېری ماشومان د سپیو له وېري ښوونځي ته نه شي تللی. همداراز مېرمنې ګاونډي کورته نه شي تللی. زما خپل پوهنتون وخت شپږ بجې پیل کیږي،خو د سپیو له وېرې پر وخت نشم رسېدلی.»
بلخوا د ټولنیزو چارو کارپوهان هم د کوڅه ډبو سپیو راټولولو ترڅنګ اوسېدونکو او ماشومانو ته د حیواناتو پر وړاندې خوندي چلن په اړه د پوهاوي پر زیاتوالي باندې ټینګار کوي.
د پوهنتون استاد علي احمد محمدي وايي:« ښار کې کوڅه ګښت سپیو له زیاتوالي دې مخنیوی وشي چې هم د ښاري نظم او خلک د هوساینې او خوندیتوب احساس وکړي. سیمه ییزې ادارې او خلک باید دا سپي راټول کړي او یا یې هم ښار کې د زیاتوالي مخنیوی وکړي. ډېری هېوادونو کې کسان شته چې کوڅه ډب سپي یو ځای کې راټولوي او ساتي ترڅو ښار کې یې د زیاتوالي مخه ونیول شي.»
له دې سره سیمه ییز مسولین وایي، ښار کې د تېر پرتله د کوڅه ډبو سپیو شمېر کم شوی او د پاتې هغو راټولولو لپاره یې هم دومداره هڅې روانې دي.
د هرات ښاروالۍ ویاند ناصر ارمل وايي:« د ښار پاکوالي او ناروغیو انتقال مخنیوي په موخه د کوڅه ډبو سپیو راټولولو، انتقال موخه موږ عملیاتي پلان له وړاندې پیل کړی او دا پلان به د ټولو کوڅه ډبو سپیو تر راټولولو پورې دوام ولري.»
د چاپېریال ساتنې ریاست د عامه اړیکو او پوهاوي مدیر حامد الهام وايي:« ښاروالۍ له عامې روغتیا ریاست سره په همکارۍ تدابیر نیولې که چیرې دا سپیان د خلکو لپاره په یو ګواښ بدل شي ټول به له ښار راټول کړي.»
د سیمه ییزو چارواکو په وینا، هر کال د ناورغیو د انتقال او چاپيریال ککړتیا د مخنیوي په موخه د اړوندو ادارو په همکارۍ د کوڅه ډبو سپیو د راټولولو او واکسین کولو لړۍ ترسره کېږي.
