د بلخ ولایت مرکز مزار شریف ښار کې د افغانستان او اوزبېکستان ګډ نندارتون پرانیستل شوی دی.
مسوولین د مولانا جلا الدین محمد بلخي په نوم دا نندارتون د صنعت کارانو ملاتړ او کورني تولیداتو ته د ودې او بازار موندنې لپاره مهم بولي.
د نندارتون جوړوونکی شکرالله بقایي وايي:« نېږدې ۲۵۰ غرفې کېږي چې بېلابېل خصوصي سکټورونه دي، خوراکي، ساختماني، لاسي صنایع، کیمیاوي سره اوورته نور دي. د نندارتون یوه برخه کې د ازبکستان هیواد لخوا هم یونیم سل شاوخواکې تجارانو او صنعت کارانو ګډون کړیچې غواړي زموږ له افغان سوادګرو سره به خبرې اتري هم ولري»
ورته مهال د بلخ صنعت او سوداګرۍ ریاست مسوولین وایي، د صنعتکارانو د ملاتړ او کورنیو تولیداتو د ودې لپاره د ورته نندارتونو جوړول دوام ولري.
د بلخ ولایت صنعت او سوداګرۍ ریس امیر محمد متقي وايي:« دا نندارتون یوازې یوه غونډه نه ده بلکې دا د افغانستان په ځانګړې توګه د بلخ ولایت د اقتصادي ظرفیتونو ښودلو او د پاڼګونې جذبولو یو مهم فرصت دی، د دې لپاره راټول شوې یو څو د خپلو صنعت کارانو فعالیتونه او نوښتونه نندارې ته وړاندې کړو.»
په همدې حال کې اوزبېکستاني چارواکي د دواړو هېوادونو دغه ډول ګډ نندارتونونه د اړیکو د پیاوړتیا لپآره مهم بللې.
دوی دغه راز په افغانستان کې د پانګونې د زیاتوالي خبر هم ورکړی.
بلخ کې د اوزبېکستان سرکونسل جعفر فتایوف وايي:« روان کال کې د افغانستان په کابل او مزار ښارونو کې درې سوداګریز مرکزونه پرانیستل شوي، وروستیو میاشتو کې د دواړو هېوادونو ترمنځ د راکړې ورکړې کچه له یو میلیارد ډالرو اووښتې او ورځ تر بلې مو سوداګرۍ برخه د پراختیا په حال کې ده.»
سره له دې چې صنعتکاران دا ډول نندارتونونه مهم بولي خو له هېوادوالو د کورنیو تولیداتو پر اخیستلو ټینګار کوي.
صنعت کار سید نظیف جاوید وايي:« زموږ غوښتنه د اسلامي امارت له چارواکو دا ده چې له صنعت کارانو سره اوږه په اوږه لکه څرنګه چې ولاړ دي ودرېږي او د نندارتونونو له طریقه د هغوی په مملکتونو کې نندارتونون جوړ کړي او تولیدات مو هغوی ته ور وپېژني.»
یو بل صنعت کار عبدالله عابدي بیا وايي:« له خلکو مو غوښتنه دا ده چې له خپلو کورنیو تولیداتو ګټه واخلي ځکه که له یوه جیب پیسې ځي خو بل جیب ته بېرته لوېږي.»
دا په داسې حال کې ده چې د اسلامي امارت له واک ته رسېدو را وروسته د مولانا جلاالدین محمد بلخي په نوم دا دویم نړیوال نندار تون دی چې د بلخ په مرکز مزارشریف ښارکې پرانیستل کېږي.
