د هرات ولایت معلولین شکایت کوي چې ورځ تربلې يې ژوند له لا ډېرو سختیو سره مخ کېږي.
دوی له سرپرست حکومته د مالي ملاتړ غوښتنه کوي او وايي، نه شي کولی د ورځني ژوند اړتیاوې پوره کړي.
د جمال الدین په نوم یو له دغو معلولینو وايي، د کورنۍ د سرپرست په توګه مجبور دی چې د لاسنیوي نه شتوالي له امله، خیرات وغواړي.
معلول جمال الدین وايي: « په کورنۍ کې درې کسان یو او زه په ستوګو معیوب یم. مېرمن مې هم ناروغه ده، کار هم نه شم کولی. بازار ته راووځم؛ تر څو مسلمانان یو څلور ډوډۍ مرسته را سره وکړي. زه له دولت هم غواړم چې زما لاسنیوی وکړي.»
یو شمېر نور معلولین هم له ورته وضعیت شکایت کوي او وایي، له شدیدو فزیکي معلولیتونو سره مخ دي او له همدې امله اړ دي چې د ژوند تېرولو لپاره ګدایي وکړي.
دوی له سرپرست حکومته د مرستې غوښتنه کوي.
د طاهر په نوم یو تن معلول وايي: « زه په تېرو جګړو کې معلول شوی یم. د کرزي حکومت وخت کې مې معاش درلود، خو د امارت په راتګ سره مې معاش قطع شو. پښه مې تاسو ګورئ، سن مې هم لوړ دی او کار نه شم کولی.»
یو بل معلول کس میر افغان وايي: « معلول یم ډېرې ستونزې لرم. زه له ایران را رد مرز شوی یم، اوس هرات کې یم له خدای پرته هېڅوک نه لرم، دا یو لاس ګاډی لرم په کې ناست یم.»
د هرات د شهیدانو او معلولینو ریاست مسوولین وايي، دغه ولایت کې نږدې ۶ زره او ۵۰۰ معلولینو کورنۍ او له ۴ زرو ډېرې د شهیدانو او یتیمانو کورنۍ ثبت دي او ژر به پرې د روان مالي کال د دوو ربعو معاش ووېشل شي.
د هرات د شهیدانو او معلولینو چارو رییس علاوالدین سعد وايي: « حوالو باندي کار روان دی، تخصیص راغلی او کوډ کې پیسې لرو. بودیجه مو شته ده او انشاالله امید لرم چې دا شپږ میاشتي چې مستحق د بودیجې کېږو، باید بودیجه حواله کړو. کوشش ورباندې روان دی چې ټولو ته پیسې حواله کړو.»
دا یوازې هرات نه دی چې معلولین په کې د ژوند له سختیو شکایت کوي بلکې د راپورونو پر بنسټ هېواد کې د اوږدې جګړې له امله ګڼ شمېر خلک د ژوند لومړنیو اړتیاوو ته اسانه لاس رسی نه لري.
دا جعلي متن دی. د ډمی مینځپانګې لپاره د ډیفالټ متن مثالونه شتون نلري نو ما باید دا رامینځته کړی وي. دا ستاسو د خپل مینځپانګې سره بدل کړئ.
