د لومړي ځل لپاره د امریکا د مرکزي قوماندانۍ قومندان منلې چې سرپرست حکومت بریالی شوی چې د داعش ډلې پر وړاندې جدي مبارزه وکړي او ترخپل حاکمیت لاندې خاوره کې یې ځپلي دي.
دغه امریکايي جګ پوړي چارواکي داسې مهال د داعش پر وړاندې مبارزه بریالۍ بللې چې د کورنیو چارو وزارت ویاند عبدالمتین قانع شمشاد سره په مرکه کې د دې ډلې حضور په ټول هېواد کې رد کړی او دغه راز یې ډاډ ورکړی چې هېڅ هېواد دې له افغان خاورې اندېښنه نه لري.
قانع په دې اړه: « نن دغه ډله چې نه افغانستان کې فزیکي حضور لري او نه هم عیني حضور، په افغانستان کې ځپل شوې او ختمه شوې ده. متأسفانه د سیمې له یو شمېر هېوادونو کله کله د دې ډلې مدیریت کېږي. کابل کې د وروستۍ پېښې په ګډون زه ادعا کولی شم چې د پاکستان او تاجیکستان هېوادونو اتباع د روسیې، ترکیې او افغانستان په ګډون په پېښو کې دخیل وو.»
قانع دغه راز ویلي چې همدا تېره اوونۍ یې په کابل کې د داعش پر یوه پټنځای عملیاتو کې د دې ډلې دوه غړي وژلي دي.
قانع زیاته کړې، د داعش ډلې بریدونه د افغانستان له پولو بهر او په ګاونډیو هېوادونو کې پلانېږي او له ګاونډیو هېوادونو غواړي چې د وسله والو او ترهګرو ډلو پر وړاندې حقیقي مبارزه وکړي.
د قانع په خبره، اسلامي امارت هڅه کړې چې له پولو بهر هم د داعش ډلې بریدونه خنثی کړي او په هېواد کې ډېری نیول شوي داعش جنګیالي د نورو هېوادونو وګړي دي.
د کورنیو چارو وزارت ویاند په دې اړه وايي: « نن د نړۍ او د سیمې هېوادونه او په ځانګړې توګه آسیايي هېوادونه له دوی متضرر دي. پاکستان هغه هېواد دی چې خپل امنیت یې نه دی تأمین کړی، تاسو د دوی د امنیتي ځواکونو وضعیت او اقتصادي وضعیت ګورئ؛ اوس په داسې یوه حالت کې دي چې سیمه یې نا امنه کړې ده. نو د دوی ادعا موږ ته اساس نه دی او موږ دوی ته وایو چې خپل امنیت تأمین کړئ او د نورو لپاره ضرر او خلل جوړ نه شي، دا نه زموږ پر ګټه دي، نه د دوی او نه هم د اسلام چې د پردیو استخباراتو پروژې دلته عملي کړو.»
کورنیو چارو وزارت په هېواد کې د داعش د ځپلو ډاډ داسې مهال ورکوي چې د امنیتي او کشفي ادارو د مالوماتو له مخې، یاده ډله په څه باندې څلور میاشتو کې په برید کولو نه ده بیالۍ شوې.
خو یو شمېرهېوادونه افغانستان تورنوي چې د دغې ډلې جنګیالي لاهم افغانستان کې موجود دي او وېره ترې لري.
د سیاسي او پوځي چارو کارپوهان د داعش پر وړاندې د سرپرست حکومت مبارزه بریالۍ ګڼي خو غوښتنه کوي چې د پولو او د ډیورنډ فرضي کرښې امنیت دې لا ټینګ کړي.
د پوځي چارو کارپوه اسدالله ندیم وايي: « که په افغانستان کې د داعش فعالیت یا د دوی تروریستي فعالیتونه له سرحدونو د تېرېدو له امله وي، باید پولې او سرحدونه ټینګ شي او سرحدي ځواکونه او استخبارات پياوړي شي. همدارنګه د پولو دواړو لورو ته پرتو ولسونو سره لا ډېر تعامل وشي او دا ورته وویل شي چې د دوی پر ګټه نه ده چې داعش یې له سیمو څخه تېر شي.»
د سیاسي چارو کارپوه محمد زلمی افغانیار وايي: « له تروریزم سره د مبارزې په برخه کې افغانستان هم متأثر شوی. دا یوه نړیواله موضوع ده، سیمه ییز او نړیوال هېوادونه او هغه زبر ځواکونه چې د مبارزې ادعا کوي، باید له افغانستان سره استخباراتي او لوجسټیکي مالومات تبادله کړي. په تېرو څلورو کالو کې اقتصاد محوره حکومت د نورو هېوادونو په چارو کې لاسوهنه نه کول او امنیت نړۍ ته د پیغام په توګه وړاندې کړي.»
دا په داسې حال کې ده چې د روان ۲۰۲۵ کال د لومړۍ میاشتې پر ۲۲ مه نېټه د اسلامي امارت امنیتي او تصفیوي چارو مرکزي کمېسیون په خپل کلني خپور کړي راپور کې پاکستان د داعش ډلې په روزنه، تمویل او ملاتړ تورن کړ او هغه مالومات یې خپاره کړل چې د کراچۍ او اسلام اباد د هوایي ډګرونو له لارې د بلوچستان او خیبر پښتونخواد قبایلي سیمو کې د داعش مرکزونو ته له سیمې هېوادونو را انتقال شوي جنګیالي لېږدول کېږي.
