د کورنیو چارو وزارت سرپرست خلیفه سراج الدین حقاني د لوی اختر په درېیو ورځو کې له ګڼو چارواکو سربېره د بېلابېلو قومي مشرانو، علماوو، ځوانانو او د خصوصي سکټور له استازو سره جلا جلا کتنې کړې دي.
نوموړي د اسلامي او ملي ګټو د خوندیتوب لپاره پر یووالي ټینګار کړی او په خبره یې د اساسي او اصلي اهدافو د هېرولو له وجې څو ځلې افغانستان له بحران سره مخ شوی.
حقاني په دې اړه وايي: « دا ترتیبونه چې کوم دي، زه یې په خپل فکر غواړم، ته یې په خپل فکر غواړې، داسې نه شي کېدای او ورانی جوړوي. کله چې زموږ کور وران شوی، دا په افغانیت او اسلامیت نه دی وران شوی؛ لامل یې دا دی چې موږ خپل علیا مقاصد پرې اېښې او د نورو د مقاصدو لپاره داسې ستونزې رامنځته شوې چې دا مملکت یې بحران ته وړی.»
د کورنیو چارو وزارت سرپرست یو ځل بیا له امنیتي ځواکونو غوښتي چې اجازه ور نه کړي څوک په هېواد کې د بې باورۍ، نافرمانۍ او اختلافونو رامنځته کولو هڅې وکړي.
حقاني په افغانستان کې جنګ پای ته رسیدلی بللی او په وینا یې، افغانان باید د سولې او ورورګلوۍ لپاره یو موټی او متحد شي.
د کورنیو چارو وزارت سرپرست په دې اړه ویلي: « موږ باید په ماضي محاسبه ونه کړو او په مستقبل اټکل ونه کړو، په مستقبل به د خیر اټکل کوو. دا د ټولو کارونو لپاره یوه مقدمه ده، موږ دا ډول محفلونه له خدای غواړو چې له یو بل سره کېنو او برداشت کړو. موږ باید په دې مانا سره وپېژنو چې د یوه افغانستان یو او د یوه اسلام دین پیرو یو.»
د سیاسي چارو کارپوهان د کورنیو چارو وزارت د سرپرست څرګندونې ستایي او وایي، د افغانستان دایمي ثبات د ټولو افغانانو په یووالي او اتحاد پورې تړلی دی.
دوی پر بهر مېشتو سیاستوالو غږ کوي چې د هېواد د آبادۍ لپاره دې بېرته افغانستان ته راستانه شي.
د سیاسي چارو کارپوه محمد سلیم پیګیر وايي: « یعنې یو بل منل، یوالی او د کمزورتیا د ټولو ټکو هېرول. موږ کولی شو د اسلامیت او افغانیت پر محور سره راټول شو او خپل هېواد آباد کړو.»
یو تن قومي مشر وايي: « په هغو ملکونو کې چې امنیت وي، سوله وي، جګړې نه وي او د خلکو ترمنځ یې وروولي وي، هغه ملکونه ډېر ژر له اقتصادي، تعلیمي، اجتماعي او سیاسي پلوه ټولو مسایلو ته لاسرسی پيدا کوي. غوښتنه مو دا ده چې د امنیت ترڅنګ د افغانستان خلک له اقتصادي پلوه هم خودکفا شي.»
د کورنیو چارو وزارت سرپرست له دې وړاندې هم په خوست کې یوې غونډې ته ویلي و چې هېڅوک د افغانستان پرخلکو معامله نه شي کولی او ټینګار یې کړی چې ټول باید د افغانستان پرمختګ او آبادۍ ته کار وکړي.
