ازبېکستان کې د پانګونې نړیوال فورم کنفرانس هر کال د شاوخوا ۱۰۰ هېوادونو د ولسمشرانو، لومړي وزیرانو او لوړ پوړو چارواکو په ګډون جوړېږي.
د دې کنفراسن په سږنۍ څلورمه غونډه کې د اسلامي امارت په استازیتوب د صنعت او سوداګرۍ وزارت سرپرست پرمشرۍ یو پلاوی د ازبېکستان پلازمېنې تاشکند ته رسېدلی.
د صنعت او سوداګرۍ وزارت وايي، د دې سفر موخه په تاشکند کې د پانګونې په څلورم نړیوال کنفرانس کې ګډون او د دواړو هېوادونو ترمنځ د پخوانیو پرېکړو او ژمنو ارزونه ده.
د صنعت او سوداګرۍ وزارت ویاند اخند زاده عبدالسلام جواد وايي:« د صنعت او سوداګرۍ وزارت د سرپرست نورالدین عزیزي او د دولتي شرکتونو د عمومي رییس احمد جان بلال په ګډون د اسلامي امارت یو جګ پوړی پلاوی د ازبېکستان په رسمي بلنه دغه هېواد ته تللی دی. له دې سفر موخه د تاشکند پانګونې په څلورم نړیوال کنفرانس کې ګډون او د دواړو هېوادونو ترمنځ د تېرو پرېکړو او ژمنو تعقیب دی. دا د سیمې پر کچه له سترو کنفرانسونو دی چې هر کال په یوه هېواد کې جوړېږي.»
د اقتصادي چارو شنونکي په دې باور دي چې یاده غونډه د سټراټیژیکو هوکړو، د بهرنۍ پانګونې جلبولو او ګډون کوونکوهېوادونو د سوداګرو او پانګه والو ترمنځ د همکارۍ د زیاتېدو لپاره ګټوره ده.
دوی ټینګار لري چې اسلامي امارت دې له دې او ورته فرصتونه ګټه واخلي.
د اقتصادي چارو شنونکی نور الله عزیز وايي:« باید افغانستان ته فرصت ورکړي چې له هغو ټولو هېوادونو سره د تجارت، ټرانزیټ او نویو پروژو د تطبیق لپاره اړیکې جوړې کړي چې په دې کنفرانس کې ګډون کوي. همدارنګه ترڅنګ یې د نړۍ په نورو هېوادونو کې د افغان تولیداتو لپاره بازارونه ولټوي.»
د اقتصادي چارو شنونکی عبدالجبار ساپی وايي: « په دې کنفرانس کې د اسلامي امارت د پلاوي او په ځانګړې توګه د صنعت او سوداګرۍ وزارت د سرپرست ګډون ډېر مهم دی. دا ګډون هم له اقتصادي، هم سیاسي او هم امنیتي پلوه ګټور دی. په دې کې به انشاالله ښې لاسته راوړنې ولرو؛ ځکه چې اوس د نړیوالو فکر افغانستان ته راګرځېدلی او غواړي دلته پر لویو او کوچنیو پروژو پانګونه وکړي.»
د اقتصادي چارو د ځینو شنونکو په اند، دغه شان لویو غونډو کې مخامخ ګډون کولی شي د هېوادونو سره په لویه کچه اقتصادي تعاملات رامنځته کړي.
د اقتصادي چارو شنونکی عبدالنصیر رشتیا وايي:« د منځنۍ آسیا هېوادونه او په ځانګړې توګه ازبېکستان په شدت علاقه لري چې له افغانستان سره ښې سیاسي او اقتصادي اړیکې ولري؛ ځکه چې ازبېکستان هڅه کوي ځان د افغانستان له لارې د کراچۍ او چابهار بندرونو ته ورسوي. همدا لامل دی چې ازبېکستان غواړي د افغانستان د اوسپنې پر کرښو پانګونه وکړي؛ دا ځکه مهمه ده چې ازبېکستان او په ټوله کې د منځنۍ آسیا هېوادونه پرېمانه نفت او انرژي لري او غواړي نوي بازارونه ورته پيدا کړي.»
سره له دې چې ازبېکستان په تېرو درېیو کالو کې یو له هغو هېوادونو دی چې له سرپرست حکومت سره یې پراخې سیاسي او اقتصادي اړیکې ساتلې دي.
خو په دې اړه یو نظر بیا دا هم دی چې تاشکند له کابل سره د اړیکو په ټینګولو غواړي ځان د پاکستان کراچۍ او ګوادر بندرونو ته ورسوي، ترڅو له دې لارو د سویلي آسیا له هېوادونو سره سوداګري وکړي.
