د کابل ولایتي چارواکي وايي، په تېر ۱۴۰۳ هجري لمریز کال کې د سړکونو، لویو لارو، پلونو او د اوبو رسولو شبکو د بیارغونې او جوړولو په ګډون، په بېلابېلو برخو کې يو شمېر کوچنۍ او لویې پروژې پلې شوې دي.
د دې ولايت والي امین الله عبید وايي، دغه پروژې د ۱۰ میليارده افغانيو په لګښت تطبیق شوې.
عبید په دې ا ړه وايي: « په کابل ولایت کې ډېر غټې پروژې چې تطبیق شوې او یا تر کار لاندې دي، له شاه او عروس بند او د کابل – غزني او کابل – جلال آباد له ټرانزیټي سړکونو پرته، څه کم لس میلیارده افغانیو په ارزښت پلې شوې دي. تمه لرو چې روان کال نورې پروژې هم تطبیق شي.»
د کابل والي امين الله عبید په دې ولايت کې د څښاک پاکو اوبو کمښت مني، خو ټینګار کوي چې دا ستونزه به ډېر ژر د پنجشیر سیند څخه کابل ته د اوبو په لېږدولو سره حل شي.
د کابل والي په دې اړه وايي: « په دې برخه کې اسلامي امارت په لوړه سطحه هم کار کړی او د اسلامي امارت رهبر په دې اړه اړوند وزارتونو او ادارو ته ځانګړي حکمونه کړي. موږ هم غوښتنه او وړاندیز کړی او د اوبو او انرژۍ وزارت ته احکام شوي او تمه لرو چې له دوو یا درېیو خواوو د کابل ولس ته پاکې اوبه برابرې کړو.»
په ورته وخت کې، اقتصادي کارپوهان په دې باور دي چې په هېواد کې د پراختيايي پروژو په پلې کولو سره به ښاري پراختيا او کاري فرصتونه رامنځته شي.
د سیاسي چارو شنونکی عبدالجبار ساپی وايي: « د اقتصادي پروژو په پيل کېدو سره به په ډېره لوړه کچه د خلکو لپاره د کار زمینه برابره شي او په دې سره به هم زموږ د کابل د قدیمي ښار نقشه بدله شي او هم به موږ له ساده سیسټم څخه ډیجیټل سیسټم ته واوړو. ټرانسپورټ، د ښاروالۍ له خوا صفايي او نور خدمات، بلند منزلونه، مارکېټونه او سوپرمارکېټونه او نورې ټولې اړتیاوې په پام کې ونیول شي. دا به زموږ په اقتصادي برخه، د پانګونې برخه او کارموندنې په برخه کې د کار زمینه برابره شي.»
ځینې نور بیا په هېواد کې د داسې پروژو پلي کول د کورنیو د اقتصاد ودې او ګاونډیو هېوادونو ته د ځوانانو د غیرقانوني تګ د مخنیوي لپاره هم مهمې او ارزښتناکې بولي.
د سیاسي چارو شنونکی شاکر یعقوبي وايي: « د بیارغونې او ساختماني پروژې نه یوازې د ښاري ژوند د سطحې او کیفیت پر لوړېدو مثبت اغېز لري بلکې کولی شي خلکو ته د کار زمینه برابره کړي، ګاونډیو هېوادونو ته د کارګرې طبقې له وتلو مخه ونیسي او د فقر کچه په نسبي ډول راټیټه کړي.»
د کابل ښاروالۍ د مالوماتو له مخې، کابل ښاروالۍ په تېرو درې نیمو کالو کې له ۳۰۰ کیلومټرو زیات سړکونه، نږدې ۲۴ کیلومتره کانالونه جوړ او د عامه خدماتو او تولیدي ودانیو د جوړولو لپاره يې لسګونه نورې پروژې هم پلې کړې دي.
